Last Updated:
இந்த நோட்டுகள் இன்னும் ‘செல்லுபடியாகும்’ என்ற தகுதியை இழக்கவில்லை என்று ரிசர்வ் வங்கி தெரிவித்துள்ளது.
இந்திய ரிசர்வ் வங்கி (RBI) கடந்த 2023 மே 19 அன்று 2000 ரூபாய் நோட்டுகளை புழக்கத்திலிருந்து திரும்பப் பெறுவதாக அறிவித்தது. அப்போது சந்தையில் மொத்தம் 3.56 லட்சம் கோடி ரூபாய் மதிப்பிலான 2000 ரூபாய் நோட்டுகள் இருந்தன. தற்போது ஏப்ரல் 30, 2026 நிலவரப்படி, 98.47% நோட்டுகள் வங்கி முறைக்கு திரும்பிவிட்டன. தற்போது வெறும் 5,451 கோடி ரூபாய் மதிப்பிலான நோட்டுகள் மட்டுமே மக்களிடம் எஞ்சியுள்ளன.
கையில் 2000 ரூபாய் நோட்டுகளை வைத்துள்ளவர்கள் அச்சப்படத் தேவையில்லை என்றும் இந்த நோட்டுகள் இன்னும் ‘செல்லுபடியாகும்’ (Legal Tender) என்ற தகுதியை இழக்கவில்லை என்று ரிசர்வ் வங்கி தெளிவுபடுத்தியுள்ளது. ஆனால், இவற்றை நீங்கள் நேரடியாகக் கடைகளிலோ அல்லது சந்தையிலோ கொடுத்துப் பொருட்களை வாங்க முடியாது; வங்கிகளிலும் நேரடியாக மாற்ற முடியாது. இவற்றை மாற்றுவதற்கு RBI சில குறிப்பிட்ட வழிமுறைகளை வழங்கியுள்ளது.
பொதுமக்கள் நாடு முழுவதும் உள்ள ரிசர்வ் வங்கியின் 19 மண்டல அலுவலகங்களுக்கு நேரடியாகச் சென்று தங்களின் 2000 ரூபாய் நோட்டுகளை மாற்றிக் கொள்ளலாம் அல்லது தங்களின் வங்கிச் கணக்கில் நேரடியாகச் செலுத்தலாம்.
உங்கள் நகரில் ரிசர்வ் வங்கி அலுவலகம் இல்லை என்றால், கவலைப்படத் தேவையில்லை. நாட்டின் எந்தவொரு அஞ்சலகத்திற்கும் (Post Office) சென்று, ‘இன்சூர்ட் போஸ்ட்’ மூலம் உங்கள் நோட்டுகளை RBI அலுவலகத்திற்கு அனுப்பி வைக்கலாம். அந்தப் பணம் நேரடியாக உங்களது வங்கிச் கணக்கில் வரவு வைக்கப்படும்.
இந்த நோட்டுகள் இன்னும் செல்லுபடியாகும் என்றாலும், இவற்றைத் தேவையற்ற தாமதமின்றி அஞ்சலகம் அல்லது ரிசர்வ் வங்கி மூலம் விரைவாக உங்களது வங்கிக் கணக்கிற்கு மாற்றிக் கொள்ள வேண்டும் என்றும் ரிசர்வ் வங்கி எச்சரித்துள்ளது.
Jul 09, 2026 12:57 PM IST
