இலங்கையின் வனவிலங்கு சட்டங்களின் கீழ் முற்றிலும் பாதுகாக்கப்பட்ட விலங்கினமாகப் பிரகடனப்படுத்தப்பட்டுள்ள புள்ளிமானை (கேளையாடு – Barking Deer) கொன்று, இறைச்சியாக்கிய குற்றச்சாட்டில் கைது செய்யப்பட்ட இரண்டு நபர்களுக்கு நீதிமன்றம் மொத்தம் 180,000 ரூபாய் அபராதம் விதித்துள்ளது.
நுவரெலியா வன அதிகாரிகளுக்குக் கிடைத்த இரகசியத் தகவலின் பேரில், வனப் பாதுகாப்புத் திணைக்களம் மற்றும் ஹக்கல வனவிலங்கு சரணாலயப் பாதுகாப்பு அலுவலக அதிகாரிகள் இணைந்து கடந்த ஜூன் 5ஆம் திகதி நாணுஓயா, பரகும்புர பகுதியில் திடீர் சுற்றிவளைப்பு ஒன்றை மேற்கொண்டனர். இதன்போதே இச்சந்தேகநபர்கள் இருவரும் கைது செய்யப்பட்டனர்.
இந்தச் சுற்றிவளைப்பு நடவடிக்கையின் போது, சந்தேகநபர்களிடமிருந்து நான்கு கிலோகிராம் புள்ளிமான் இறைச்சி, விலங்கின் தலை மற்றும் தோல் ஆகியவற்றுடன், வனவிலங்குகளைப் பிடிப்பதற்காகப் பயன்படுத்தப்பட்டதாகக் கூறப்படும் 30 கம்பிப் பாசுகளும் அதிகாரிகளால் கைப்பற்றப்பட்டன.
‘இந்தியன் முன்ட்ஜாக்’ (Indian Muntjac) அல்லது ‘கேளையாடு’ (Barking Deer) என்று அழைக்கப்படும் இந்த விலங்கினம், வனவிலங்கு மற்றும் தாவரப் பாதுகாப்பு அவசரச் சட்டத்தின் கீழ் முற்றிலும் பாதுகாக்கப்பட்ட பாலூட்டியாகப் பட்டியலிடப்பட்டுள்ளது.
கைது செய்யப்பட்ட சந்தேகநபர்களும் கைப்பற்றப்பட்ட பொருட்களும் கடந்த ஜூன் 8ஆம் திகதி நுவரெலியா நீதவான் நீதிமன்றில் ஆஜர்படுத்தப்பட்ட போதே, நீதிமன்றம் அவர்களுக்கு 180,000 ரூபாவை அபராதமாக விதித்துத் தீர்ப்பளித்தது.
வனப் பாதுகாப்புத் திணைக்களத்தின் அதிகாரிகளான வனவிலங்கு தளப் பாதுகாவலர் ஏ.எம்.சி. மதுரங்க, வனவிலங்கு தள உதவியாளர் ஏ.எம்.எஸ்.கே. ஆலோக பண்டார, வனவிலங்கு ஒழுங்குபடுத்துநர் ஆர். தனுஷ்க ஹலம்பகே, கள உதவியாளர்களான வி.எம்.எஸ்.எஸ். ஸ்ரீ சஞ்சீவ, பி. அஜித் சாந்த மற்றும் சாரதி எஸ்.என்.பி. டி சில்வா ஆகியோர் அடங்கிய குழுவினரே இந்தச் சுற்றிவளைப்பை மேற்கொண்டிருந்தனர்.
