கோலாலம்பூர்:
மலேசிய ரயில்வே நிறுவனம் (Keretapi Tanah Melayu Bhd – KTMB) வரலாற்றில் முன்னெப்போதும் இல்லாத ஒரு மாபெரும் அதிரடி நடவடிக்கையாக, அடுத்து வரவிருக்கும் நீண்ட தொடர் விடுமுறை காலத்தைக் கருத்தில் கொண்டு ஒட்டுமொத்தமாக 347,000 (3 லட்சத்து 47 ஆயிரம்) பயண இருக்கைகளை பொதுமக்களுக்காக ஏற்பாடு செய்துள்ளது.
ஹரிராயா ஐடிலாத்ஹா (Hari Raya Aidiladha), வெசாக் தினம் (Wesak Day) மற்றும் மலேசியப் பேரரசர் மாட்சிமை தங்கிய சுல்தான் இப்ராஹிம் அவர்களின் அதிகாரப்பூர்வ பிறந்தநாள் என மூன்று முக்கியப் பொது விடுமுறைகள் அடுத்தடுத்த இரண்டு வாரங்களுக்குள் வருவதால், சொந்த ஊர் திரும்பும் பயணிகளின் எண்ணிக்கை வழக்கத்தை விடப் பல மடங்கு அதிகரிக்கும் என எதிர்பார்க்கப்படுகிறது. இந்த அசாதாரணத் தேவையைப் பூர்த்தி செய்வதற்கே இந்த வரலாற்றுச் சிறப்புமிக்க ஏற்பாடு செய்யப்பட்டுள்ளது.
இன்று கேஎல் செண்ட்ராலில் (KL Sentral) செய்தியாளர்களைச் சந்தித்த KTMB குழுமத்தின் தலைமை நிர்வாக அதிகாரி (CEO) டத்தோ அஸ்லான் ஷா அல் பக்ரி பேசுகையில், “இந்த முறை நாம் மிக நீண்ட தொடர் விடுமுறை காலத்தை எதிர்கொள்கிறோம். எனவே, கடந்த ஹரிராயா ஐடில்பித்ரி (Hari Raya Aidifitri) பெருநாளை விடவும் மிக அதிக எண்ணிக்கையிலான டிக்கெட்டுகளை இந்த ஐடிலாத்ஹா பெருநாளுக்காகப் பொதுமக்களுக்கு வழங்கியுள்ளோம். கடந்த பண்டிகைக் காலத்தில் 150,000 இருக்கைகள் மட்டுமே வழங்கப்பட்டிருந்த நிலையில், தற்போது அதனை இரண்டு மடங்கிற்கும் மேலாக (347,000 இருக்கைகள்) அதிகரித்துள்ளோம்,” என்று டத்தோ அஸ்லான் ஷா பெருமிதத்துடன் குறிப்பிட்டார்.
ஒட்டுமொத்தமாக 900-க்கும் மேற்பட்ட இரயில் பயணங்களை உள்ளடக்கிய இந்த டிக்கெட்டுகளில், ஏற்கனவே 80 விழுக்காடு அல்லது 270,000 டிக்கெட்டுகள் விற்றுத் தீர்ந்துவிட்டன. தற்போது வெறும் 60,000 முதல் 70,000 வரையிலான டிக்கெட்டுகள் மட்டுமே எஞ்சியுள்ளன.
கிழக்குக் கரைப் பகுதி (East Coast): ‘எக்ஸ்பிரஸ் ராக்யாட் திமுரான்’ (Ekspres Rakyat Timuran) சேவைக்கான அனைத்து டிக்கெட்டுகளும் 100% முழுமையாக விற்றுத் தீர்ந்துவிட்டன.
தெற்குப் பகுதி (KL – ஜொகூர் பாரு): 88 விழுக்காடு டிக்கெட்டுகள் விற்பனையாகியுள்ளன.
வடகாரப் பகுதி (KL – பாடாங் பெசார்): 82 விழுக்காடு டிக்கெட்டுகள் விற்பனையாகியுள்ளன.
சொந்த ஊர் திரும்பும் மக்களின் பயணச் செலவைக் குறைக்கும் நோக்கில், KTMB நிறுவனம் ‘மடானி30’ (Madani30) என்ற சிறப்புத் திட்டத்தை அறிமுகப்படுத்தியுள்ளது. இதன் மூலம் குறிப்பிட்ட விதிமுறைகளுக்கு உட்பட்டு பயணிகள் தங்களின் டிக்கெட் விலையில் 30 விழுக்காடு தள்ளுபடியைப் பெற முடியும்.
மேலும், ‘எக்ஸ்பிரஸ் லம்பையான் ஐடிலாத்ஹா’ (ELA) சிறப்பு இரயில் சேவையின் உயர் ரக இருக்கைகளுக்கும் (Superior Seats) இந்த 30% தள்ளுபடி பொருந்தும் என அறிவிக்கப்பட்டுள்ளது.
பயணிகளின் பாதுகாப்பான மற்றும் வசதியான பயணத்தை உறுதி செய்ய இரயில் பெட்டிகள், தண்டவாளங்கள், சிக்னல் அமைப்புகள் மற்றும் அவசரகாலத் திட்டங்கள் அனைத்தும் முழுமையாகத் தயார் நிலையில் வைக்கப்பட்டுள்ளன.
மேலும், KTMB-இன் ஸ்மார்ட்போன் செயலிகள் (Apps) மற்றும் திறந்தவெளி கட்டண முறை (Open Payment System) மூலம் ‘டிக்கெட் இல்லாத போர்டிங்’ (Ticketless Boarding) முறை பயன்படுத்தப்படுவதால், பொதுமக்கள் போலி டிக்கெட் மோசடிகள் குறித்து எந்தவித அச்சமும் கொள்ளத் தேவையில்லை என்றும் சிஇஓ டத்தோ அஸ்லான் ஷா அக்ரி தெளிவுபடுத்தியுள்ளார்.
