Last Updated:
நீலகிரி மாவட்டத்தில் அறுவடைக்கு தயாராக உள்ள சிவப்பு மற்றும் பச்சை முட்டைகோஸ்களுக்கு போதுமான விலை கிடைக்காததால் விவசாயிகள் வெட்டாமல் காத்திருக்கின்றனர்.
நீலகிரி மாவட்டத்தில் அறுவடைக்கு தயாராக உள்ள சிவப்பு மற்றும் பச்சை முட்டைகோஸ்களுக்கு போதுமான விலை கிடைக்காததால் விவசாயிகள் வெட்டாமல் காத்திருக்கின்றனர். தொடர்ந்து பெய்து வரும் மழையால் முட்டைகோஸ் அழுகும் அபாயம் உள்ளதாகவும் அவர்கள் கவலை தெரிவிக்கின்றனர்.
மலை மாவட்டமான நீலகிரியில் ஊட்டி அவலாஞ்சி சாலையில் பல்வேறு இடங்களில் முட்டைகோஸ் அதிக அளவில் பயிரிடப்பட்டுள்ளது. கர்நாடகாவில் இருந்து வரவழைக்கப்படும் நாற்றுகள் மூலம் சாகுபடி செய்யப்பட்டுள்ள இந்த முட்டைகோஸ்கள் தற்போது அறுவடைக்கு தயாராக உள்ளன. எனினும், சந்தையில் விலை கடுமையாக சரிந்துள்ளதால் விவசாயிகள் முட்டைகோஸை அறுவடை செய்யாமல் காத்திருக்கும் நிலைக்கு தள்ளப்பட்டுள்ளனர்.
பச்சை முட்டைகோஸ் நாற்று ஒரு ரூபாய்க்கும், இளஞ்சிவப்பு முட்டைகோஸ் நாற்று இரண்டு ரூபாய்க்கும் வாங்கப்பட்டு நடவு செய்யப்படுகிறது. எரு, மருந்து மற்றும் பணியாட்கள் கூலி ஆகியவற்றால் விவசாயிகளுக்கு அதிக செலவு ஏற்படுகிறது. இந்நிலையில், தொடர்ந்து மழை பொழிவதால் அறுவடைக்கு தயாராக உள்ள முட்டைகோஸ் அழுகும் நிலை ஏற்பட்டுள்ளதாக விவசாயிகள் கவலை தெரிவிக்கின்றனர்.
இதுகுறித்து முட்டைகோஸ் விவசாயி தேவராஜ் தெரிவிக்கையில், மேட்டுப்பாளையம் மார்க்கெட்டில் முன்பு 25 ரூபாய்க்கு விற்பனையான முட்டைகோஸ் தற்போது 7 அல்லது 8 ரூபாய்க்கு விற்பனை ஆகிறது என்றார். மேலும், முன்பு 50 ரூபாய்க்கு விற்பனையான சிகப்பு முட்டைகோஸ் தற்போது 20 ரூபாய்க்கும் குறைவாக விற்பனை ஆவதாகவும் அவர் கூறினார்.
விலை உயரும் என்ற நம்பிக்கையில் தாங்கள் காத்திருப்பதாக விவசாயிகள் தெரிவிக்கின்றனர். குறைந்தபட்சம் 25 ரூபாய்க்கு மேல் விலை கிடைத்தால் மகிழ்ச்சியாக இருக்கும் என்றும், நல்ல விலை கிடைத்தால் மட்டுமே அடுத்த போகம் விவசாயத்திற்கு முதலீடு செய்ய ஏதுவாக இருக்கும் என்றும் விவசாயிகள் கவலைத் தெரிவித்துள்ளனர்.
