Tech Layoff: ஒரே அறிவிப்பு.. 660 பேரை வீட்டுக்கு அனுப்பிய அமெரிக்க நிறுவனம்..!
அமெரிக்காவின் முன்னணி வெப் மார்கெட்டிங் சேவை நிறுவனமான HubSpot தனது வாடிக்கையாளர்களுக்கு அளித்து வரும் பல்வேறு சேவைகளில் ஏஐ அடிப்படையிலான சேவைகளாக மேம்படுத்த முடிவு செய்துள்ளது. இதனால் அந்நிறுவனத்தில் எப்போதும் இல்லாத மிகப்பெரிய ஊழியர்கள், வர்த்தகம், பிஸ்னஸ் ஆப்ரேஷன்ஸ் மறுசீரமைப்பு செய்யப்பட்டு வருகிறது.
இதன் வாயிலாக HubSpot தனது உலகளாவிய வர்த்தகத்தில் சுமார் 7 சதவீத ஊழியர்கள் அதாவது 660 ஊழியர்களை பணிநீக்கம் செய்ய முடிவு செய்துள்ளது. சமீபத்தில் இன்டெல், ஆப்பிள், ஆராக்கிள், பேபால் நிறுவனங்கள் பெரும் எண்ணிக்கையில் ஊழியர்களை பணிநீக்கம் செய்த நிலையில் அக்டோபர் மாதம் டெக் துறையில் Anchorage Digital நிறுவனத்தைத் தொடர்ந்து HubSpot பணிநீக்கத்தை அறிவித்துள்ளது.
இந்த பணிநீக்கம் குறித்த அறிவிப்பை ஹாப்ஸ்பாட் நிறுவனம் செவ்வாய்க்கிழமை வெளியிட்ட நிலையில், இப்பணிநீக்கத்திற்காக சுமார் 65 – 76 மில்லியன் டாலர் அளவிலான தொகை செலவாகும் என HubSpot நிறுவனம் தெரிவித்துள்ளது.
HubSpot நிர்வாகம் பணிநீக்கம் செய்யப்படும் ஊழியர்களுக்கு 20 வாரத்திற்கான அடிப்படை சம்பளம், அவர்கள் பணி செய்யப் பயன்படுத்தி வரும் லேப்டாப், புதிய வேலைவாய்ப்பு தேடுவதற்காக உதவிகளையும் வழங்க உள்ளதாக அறிவித்துள்ளது.
உலகம் முழுவதும் ஏஐ தொழில்நுட்பம் சார்ந்த பணிநீக்கத்தை அதிகரித்துள்ள நிலையில் இதில் HubSpot-ம் இணைந்துள்ளது. ஏஐ தொழில்நுட்பம் மூலம் பல வேலைகளை ஒரு சில நொடிகளில் முடிக்க முடியும் என்பதால் ஊழியர்களுக்கான பணிச் சுமை வேகமாக முடிகிறது.
இதேபோல் நிறுவனத்தின் செயல்திறனும் அதிகரிக்கும் காரணத்தால் குறைந்த எண்ணிக்கையிலான ஊழியர்களைக் கொண்டே அதிகப்படியான பணிகளைச் செய்து முடிக்கும் வாய்ப்புகள் அதிகரித்துள்ளது. இதனால் சேவைத் துறையில் துவங்கி உற்பத்தித் துறை வரையில் ஏஐ பயன்பாடு அதிகரித்துள்ளது.
இதற்கு ஏற்றார் போல் கிளாட், சாட்ஜிபிட் நிறுவனத்தின் ஒவ்வொரு பிரிவின் பணிகளைச் செய்யச் சிறப்பு ஏஐ மாடலை உருவாக்கி அறிமுகம் செய்துள்ளது, இதனால் ஏஐ தொழில்நுட்பத்தைப் பயன்பாட்டுக்குக் கொண்டு வருவதும் எளிதாகியுள்ளது.
இதன் விளைவாக மே மாதம் மட்டும் ஏஐ தொடர்புடைய காரணத்தால் 38,579 ஊழியர்கள் தங்களுடைய பணியை இழந்துள்ளனர். இது இந்த வருடத்தில் அதிகப்படியான ஏஐ பணிநீக்கம் எண்ணிக்கை பதிவான மாதமாகும். 2026ல் மட்டும் சுமார் 313 நிறுவனங்கள் மொத்தம் 1,31,382 டெக் ஊழியர்களை பணிநீக்கம் செய்துள்ளது குறிப்பிடத்தக்கது.
