ரிலையன்ஸ் ஜியோ பிளாட்ஃபார்ம்ஸ் நிறுவனத்தின் நிர்வாக இயக்குநர் ஆகாஷ் அம்பானி, ஜியோவின் 10-ஆம் ஆண்டு நிறைவையொட்டி, நிறுவனம் வெறும் தொலைத்தொடர்புச் சேவையுடன் நிற்காமல், உலகளாவிய தொழில்நுட்பப் பேராதிக்கத்தை நோக்கி எவ்வாறு விரிவடைந்து வருகிறது என்பதை விரிவாகப் பகிர்ந்துள்ளார்.
ரிலையன்ஸ் ஜியோ நிறுவனம் தொடங்கப்பட்டு 10 ஆண்டுகள் நிறைவடைந்துள்ள நிலையில், அது தனது அடுத்தகட்ட வளர்ச்சிப் பயணத்திற்குத் தயாராகி வருகிறது.
ஆரம்பத்தில் மலிவு விலையில் டேட்டா மற்றும் அதிவேக இணையச் சேவையை வழங்கி இந்தியத் தொலைத்தொடர்புத் துறையில் புரட்சி ஏற்படுத்திய ஜியோ, தற்போது இந்தியாவிலேயே சொந்தமாகத் தொழில்நுட்ப காப்புரிமைகள், செயற்கை நுண்ணறிவு (AI), கிளவுட் சேவைகள் மற்றும் 5G/6G தொழில்நுட்பங்களை உருவாக்கும் ஒரு சர்வதேசத் தொழில்நுட்ப நிறுவனமாக உருவெடுத்துள்ளது.
ஜியோ பிளாட்ஃபார்ம்ஸ் நிறுவனத்தின் நிர்வாக இயக்குநர் ஆகாஷ் அம்பானி இது குறித்துப் பேசுகையில், “ஜியோ இன்று வெறும் தொலைத்தொடர்பு நிறுவனம் என்ற நிலையைத் தாண்டி வெகுதூரம் வந்துவிட்டது. இணைப்புச் சேவைகள், டிஜிட்டல் தயாரிப்புகள், தொழில் நிறுவனங்களுக்கான தீர்வுகள் மற்றும் செயற்கை நுண்ணறிவு என பல துறைகளில் இந்தியாவிலேயே தயாரிக்கப்பட்ட சொந்தத் தொழில்நுட்பங்களை நாங்கள் உருவாக்கி வருகிறோம். இத்தொழில்நுட்பங்களை உலகச் சந்தைக்குக் கொண்டு சென்று, உலகிற்கான தொழில்நுட்பத்தை உருவாக்கும் மையமாக இந்தியாவை மாற்றுவதே எங்கள் நோக்கம்” என்று தெரிவித்தார்.
கடந்த காலங்களில் இந்தியாவில் பயன்படுத்தப்பட்ட தொலைத்தொடர்புத் தொழில்நுட்பங்கள் வெளிநாடுகளிலிருந்தே இறக்குமதி செய்யப்பட்டன. ஆனால் ஜியோ, தனது சொந்த 5G தொழில்நுட்பக் கட்டமைப்பை (5G Stack) இந்தியாவில் உருவாக்கியுள்ளது.
மார்ச் 31, 2026 நிலவரப்படி, ஜியோ பிளாட்ஃபார்ம்ஸ் மற்றும் அதன் துணை நிறுவனங்கள் 4G, 5G, 6G, AI மற்றும் கிளவுட் துறைகளில் 6,817 காப்புரிமைகளுக்குப் விண்ணப்பித்துள்ளன. இதில் 1,009 காப்புரிமைகள் உலகளவில் அதிகாரப்பூர்வமாகப் பெறப்பட்டுள்ளன. உலக அறிவுசார் சொத்து அமைப்பின் (WIPO) காப்புரிமைப் பட்டியலில் ஜியோ உலகளவில் 12-வது இடத்தைப் பிடித்து சாதனை படைத்துள்ளது.
ஃபைபர் கேபிள்களைக் கொண்டு செல்வது கடினமாக உள்ள இந்தியப் பகுதிகளுக்கு, சொந்தமாக ‘UBR’ (Unlicensed Band Radio) தொழில்நுட்பத்தை உருவாக்கி அதிவேகப் பிராட்பேண்ட் சேவையை வழங்கியுள்ளது.
தற்போது 52.4 கோடிக்கும் அதிகமான பயனர்களையும், 26.8 கோடி 5G வாடிக்கையாளர்களையும் கொண்டுள்ள ஜியோ, தனது சொந்தத் தொழில்நுட்பங்களை ஆசியா, ஆப்பிரிக்கா மற்றும் லத்தீன் அமெரிக்க நாடுகளுக்கு ஏற்றுமதி செய்யத் திட்டமிட்டுள்ளது. மேலும், 6G தொழில்நுட்பத்திற்கான உலகளாவிய தரநிலைகளை நிர்ணயிக்கும் பணிகளிலும் ஜியோ தீவிரமாகப் பங்கேற்று வருகிறது.
