கோலாலம்பூர்:
கடந்த வாரம் தனது மனைவியைக் கொடூரமாகக் குத்திக் கொன்ற குற்றத்திற்காக, வேலை இல்லாத 43 வயது கணவன் மீது இன்று கூலிம் மாஜிஸ்திரேட் நீதிமன்றத்தில் கொலைக் குற்றம் சாட்டப்பட்டது.
மாஜிஸ்திரேட் நூர் ஹமிஸா மாத் ஷா முன்னிலையில் குற்றச்சாட்டு வாசிக்கப்பட்டதும், சந்தேக நபரான ஜி. விக்னேஸ்வரன் (வயது 43) தனக்கு எதிரான குற்றச்சாட்டத்தைப் புரிந்து கொண்டதாகத் தலையசைத்தார்.
வழக்கறிஞர் எவரும் இன்றி ஆஜரான அவரிடம், கொலை வழக்கு உயர் நீதிமன்றத்தின் அதிகார வரம்பிற்குட்பட்டது என்பதால் எந்த வாக்குமூலமும் பதிவு செய்யப்படவில்லை.
குற்றச்சாட்டுகளின்படி, கடந்த செப்டம்பர் 14-ஆம் தேதி மாலை 6.30 மணி முதல் இரவு 9.04 மணிக்கு இடையில், தாமான் திராம் பகுதியிலுள்ள வீடொன்றில் எஸ். சீலா (வயது 39) என்ற பெண்ணை விக்னேஸ்வரன் கொலை செய்ததாகக் குற்றம் சாட்டப்பட்டுள்ளது.
“கணவன் – மனைவிக்கு இடையே ஏற்பட்ட பொறாமை சார்ந்த தகராறே இந்த கொலைக்குக் காரணம் என நம்பப்படுகிறது.
மடக்கும் கத்தியைப் பயன்படுத்தித் தனது மனைவியை விக்னேஸ்வரன் 13 முறை குத்தியுள்ளார். “இந்தக் கொடூரத் தாக்குதலில் பாதிக்கப்பட்ட பெண்ணின் நெஞ்சுப் பகுதியில் 7 குத்துகளும், வயிற்றுப் பகுதியில் 5 குத்துகளும், வலது விலாப்புறத்தில் ஒரு குத்தும் விழுந்து அவர் பரிதாபமாக உயிரிழந்தார்.
இந்த ரத்தக் களறி தாக்குதலுக்குப் பிறகு, 43 வயது சந்தேக நபர் லுனாஸ் காவல் நிலையத்திற்கு நேரில் சென்று, தான் மனைவியைக் குத்தியதை ஒப்புக் கொண்டார்.
இவ்வழக்கு குற்றவியல் சட்டத்தின் பிரிவு 302-இன் கீழ் தொடரப்பட்டுள்ளது. அத்தோடு சந்தேக நபருக்கு ஜாமீன் எதுவும் வழங்கப்படாத நிலையில், வழக்கு மறு விசாரணைக்காக வரும் டிசம்பர் 8-ஆம் தேதிக்கு ஒத்திவைக்கப்பட்டது.
