இலங்கை விஷ்வ ஹிந்து பரிஷத் ஏற்பாட்டில் விநாயகர் சதுர்த்தியை முன்னிட்டு கொட்டகலை கொமர்ஷியல் வாவியில் கொட்டும் மழையிலும் 17 பிரமாண்ட விநாயகர் சிலைகள் விசர்ஜனம் செய்யப்பட்டன.
விநாயகர் சதுர்த்தி விழாவை முன்னிட்டு, கொட்டகலை கொமர்ஷியல் வாவியில் 17 பிரமாண்ட விநாயகர் சிலைகள் கொட்டும் மழையிலும் பக்திப் பெருக்குடன் நேற்று (20) விசர்ஜனம் செய்யப்பட்டன. இலங்கை விஷ்வ ஹிந்து பரிஷத் ஏற்பாட்டில் நேற்று ஞாயிற்றுக்கிழமை இந்நிகழ்வு மிகவும் பிரமாண்டமாக இடம்பெற்றது.
இந்தியாவிலிருந்து கொண்டு வரப்பட்ட 17 பிரமாண்ட விநாயகர் சிலைகள், கொட்டகலையைச் சூழவுள்ள நகரங்கள் மற்றும் பெருந்தோட்டங்களிலிருந்து கலை, கலாசார நிகழ்வுகளுடன் ஊர்வலமாக எடுத்து வரப்பட்டன. கொட்டகலை ரொசிட்டா நகரிலிருந்து புறப்பட்ட இந்த ஆன்மிக ஊர்வலம் கொமர்ஷியல் வாவியைச் சென்றடைந்ததும், முறைப்படி சிலைகள் நீரில் கரைக்கப்பட்டன.
இலங்கை விஷ்வ ஹிந்து பரிஷத் விநாயகர் சதுர்த்தி ஏற்பாட்டுக் குழுவின் தலைவர் ஆர். விஜயபாலன் ஜி தலைமையில் இந்நிகழ்வு நடைபெற்றது. இதில் இலங்கை இராமகிருஷ்ண மிஷன் தலைவர் ஸ்ரீமத் சுவாமி அக்ஷராத்மானந்தஜி மகாராஜ், இலங்கை சின்மயா மிஷன் ஆச்சாரியார் பிரம்மச்சாரி கார்த்திக் சைதன்யா, பட்டிமன்றப் பேச்சாளர் சொல்லின் செல்வன் மணிகண்டன், அமைப்பின் நிர்வாகிகள், நகர வர்த்தகர்கள் மற்றும் பெருந்தோட்டப் பகுதிகளைச் சேர்ந்த பெருந்திரளான பக்தர்கள் மழையையும் பொருட்படுத்தாமல் கலந்துகொண்டனர்.
