சர்வதேச கால்பந்தாட்டச் சம்மேளன உலகக் கிண்ணத் தொடரில் அறிமுக அணியாகக் களம் புகுந்துள்ள கேப் வேர்ட் அணி, சவூதி அரேபியாவுக்கு எதிரான போட்டியை 0-0 எனச் சமநிலையில் முடித்து, உலகக் கிண்ண வரலாற்றில் விலகல் முறையிலான சுற்றுக்குத் தகுதி பெற்ற மிகச்சிறிய நாடு என்ற புதிய சாதனையைப் படைத்துள்ளது. இதன் மூலம் மியாமியில் நடைபெறவுள்ள அடுத்த சுற்றுப் போட்டியில் நடப்பு உலக சம்பியனான ஆர்ஜென்டினாவை எதிர்கொள்ளும் வரலாற்று வாய்ப்பையும் அந்த அணி பெற்றுள்ளது.
குழு எச்சின் மற்றொரு போட்டியில் ஸ்பெயின் அணி 1-0 என உருகுவேயை வீழ்த்தி 7 புள்ளிகளுடன் முதலிடத்தைப் பிடித்தது. அதேவேளை, தனது மூன்று போட்டிகளையும் தகுதியான முறையில் சமநிலை செய்த கேப் வேர்ட் அணி 3 புள்ளிகளுடன் இரண்டாவது இடத்தைப் பிடித்து அடுத்த சுற்றுக்கு முன்னேறியது. உருகுவே மற்றும் சவூதி அரேபியா ஆகிய அணிகள் தலா 2 புள்ளிகளுடன் தொடரிலிருந்து வெளியேறின.
சுமார் 5 இலட்சம் மக்கள் தொகையைக் கொண்ட இந்த ஆபிரிக்கத் தீவு நாடு, ஸ்பெய்னுக்கு எதிரான கோல்கள் இல்லாத சமநிலை மற்றும் உருகுவேக்கு எதிரான 2-2 என்ற விறுவிறுப்பான சமநிலை ஆட்டங்கள் மூலம் ரசிகர்களின் நெஞ்சங்களை ஏற்கனவே கொள்ளையடித்திருந்தது குறிப்பிடத்தக்கது.
போட்டியின் சுருக்கம்:
ஆரம்பக்கட்ட வேகம்: அடுத்த சுற்றுக்கான வாய்ப்பு இரு அணிகளுக்குமே இருந்ததால், போட்டி ஆரம்பத்தில் விறுவிறுப்பாகக் காணப்பட்டது. எனினும், தவறான பந்துப் பரிமாற்றங்கள் மற்றும் முரட்டுத்தனமான தடுத்தல்களால் ஆட்டத்தின் தரம் சற்றுப் பாதிக்கப்பட்டது.
கேப் வேர்டேயின் அச்சுறுத்தல்: ஆட்டத்தின் ஆரம்பத்தில் இடது பக்கவாட்டிலிருந்து முன்னேறிய வில்லி செமெடோ ஒரு ஆபத்தான உதையை மேற்கொண்டார். அதனைத் தொடர்ந்து கேப் வேர்டே அணி ஆட்டத்தை முழுமையாகத் தன்வசப்படுத்தியது.
40 வயது கோல்காப்பாளர்: முதற்பாதியின் கூடுதல் நேரத்தில் சவூதி அரேபியாவின் முகமது கன்னோ தலையால் முட்டிய பந்தை, கேப் வேர்டே அணியின் 40 வயதான மூத்த கோல்காப்பாளர் வொஸ்ப்னீயா திறம்படத் தடுத்தார். அமெரிக்க விசா கட்டணப் பிரச்சினை காரணமாக தாமதமாக மைதானத்திற்கு வந்திருந்த அவரது தாயார், கலரியில் இருந்து மகனின் இந்தத் தடுப்பைக் கண்டு மகிழ்ந்தார்.
நழுவிய வாய்ப்புகளும் ரசிகர்களின் கொண்டாட்டமும்:
இரண்டாம் பாதியில் கேப் வேர்ட் அணி கோல் அடிக்கும் நோக்கில் 15 முயற்சிகளை மேற்கொண்ட போதிலும், சவூதி அரேபியாவின் பலமான தற்காப்பால் கோல் எதுவும் பெறப்படவில்லை.
நழுவிய வெற்றி வாய்ப்பு: ஆட்டத்தின் போக்கில் கேப் வேர்டே வீரர் லாரோஸ் டுவார்டே சவூதி கோல்காப்பாளர் முகமது அலோவைஸை தனியாக எதிர்கொண்ட ஒரு மிகச்சிறந்த கோல் வாய்ப்பைக் கோட்டைவிட்டார்.
எனினும், போட்டி முடிவடைந்ததும் மைதானத்தில் இருந்த கேப் வேர்ட் வீரர்கள் மற்றும் பயிற்சியாளர்கள், குழுவின் மற்றைய போட்டி முடிவை தங்களது அலைபேசிகளின் ஊடாக அறிந்து கொண்டு, மைதானத்திலேயே கொடிகளுடன் கட்டிப்பிடித்து வரலாற்று வெற்றியைப் பெரும் ஆரவாரத்துடன் கொண்டாடினர்.
