Last Updated:
1998-இல் மலேசியாவில் நடைபெற்ற காமன்வெல்த் போட்டியில் ஆண்கள் கிரிக்கெட்டும் (ODI), 2022 பர்மிங்ஹாம் போட்டியில் பெண்கள் டி20 (T20) கிரிக்கெட்டும் இடம்பெற்றன.
2026-ஆம் ஆண்டு ஸ்காட்லாந்தின் கிளாஸ்கோ நகரில் நடைபெறவுள்ள காமன்வெல்த் விளையாட்டுப் போட்டிகளில் இருந்து கிரிக்கெட் போட்டி நீக்கப்பட்டுள்ளது விளையாட்டு ரசிகர்களிடையே பெரும் ஏமாற்றத்தை ஏற்படுத்தியுள்ளது. 2022-இல் பர்மிங்ஹாமில் நடைபெற்ற போட்டிகளில் 19 விளையாட்டுப் பிரிவுகள் இடம்பெற்றிருந்த நிலையில், கிளாஸ்கோவில் இது வெறும் 10 ஆகக் குறைக்கப்பட்டுள்ளது.
கிரிக்கெட் தவிர ஹாக்கி, பேட்மின்டன், மல்யுத்தம், டேபிள் டென்னிஸ், ஸ்குவாஷ் போன்ற முக்கிய விளையாட்டுகளும் இந்த முறை நீக்கப்பட்டுள்ளன. இதற்கு முக்கியக் காரணம் நிதி நெருக்கடி மற்றும் குறுகிய கால அவகாசமே ஆகும். ஆரம்பத்தில் போட்டியை நடத்த வேண்டிய ஆஸ்திரேலியாவின் விக்டோரியா மாநிலம், செலவு அதிகரிப்பு காரணமாக 2023-இல் விலகியது.
இதையடுத்து 2024 செப்டம்பரில் கிளாஸ்கோ மாற்று நகரமாகத் தேர்வு செய்யப்பட்டதால், குறைந்த பட்ஜெட்டில் குறைந்த நேரத்திற்குள் போட்டிகளை நடத்த அமைப்பாளர்கள் இந்த முடிவை எடுத்தனர்.
முன்னதாக 1998-இல் மலேசியாவில் நடைபெற்ற காமன்வெல்த் போட்டியில் ஆண்கள் கிரிக்கெட்டும் (ODI), 2022 பர்மிங்ஹாம் போட்டியில் பெண்கள் டி20 (T20) கிரிக்கெட்டும் இடம்பெற்றன. இதில் இந்திய மகளிர் அணி வெள்ளிப் பதக்கம் வென்றிருந்தது குறிப்பிடத்தக்கது.
இந்த விளையாட்டுப் பிரிவுகள் நீக்கம் இந்திய அணிக்கு மிகப்பெரிய பின்னடைவாகும். 2022-இல் இந்தியா வென்ற 61 பதக்கங்களில், மல்யுத்தம் (12), டேபிள் டென்னிஸ் (7), பேட்மின்டன் (6), ஹாக்கி (2), ஸ்குவாஷ் (2), கிரிக்கெட் (1) என நீக்கப்பட்ட விளையாட்டுப் பிரிவுகளில் இருந்தே 30 பதக்கங்கள் கிடைத்தன. இதனால் கிளாஸ்கோ காமன்வெல்த் போட்டியில் இந்தியாவின் பதக்கப் பட்டியல் கணிசமாகக் குறையும் அபாயம் ஏற்பட்டுள்ளது.
