உலக பொருளாதாரத்தின் முக்கிய கடல்வழிப் பாதைகளாக விளங்கும் ஹோர்முஸ் நீரிணை மற்றும் பாப் அல்-மந்தப் நீரிணை ஆகிய இரண்டும் திறந்த நிலையில் இருக்க வேண்டும் என பாகிஸ்தான் பிரதமர் ஷெஹ்பாஸ் ஷரீப் தெரிவித்துள்ளார்.
ஐக்கிய நாடுகள் பொதுச் சபையில் வெள்ளிக்கிழமை உரையாற்றிய அவர், ஏவுகணைகள், ட்ரோன்கள் மற்றும் துப்பாக்கிச் சூடுகளின் சத்தங்களுக்கு மத்தியில், இராஜதந்திரத்துக்கான குரல் இன்னும் வலுவாக ஒலிக்க வேண்டும் என வலியுறுத்தினார்.
ஹோர்முஸ் மற்றும் பாப் அல்-மந்தப் நீரிணைகள் உலக பொருளாதாரத்தின் முக்கிய உயிர்நாடிகள் எனக் குறிப்பிட்ட ஷெஹ்பாஸ் ஷரீப், அவை நாடுகளை ஒன்றிணைக்கும் கடல்வழிகளாகத் தொடர வேண்டுமே தவிர, மோதலுக்கான தடுப்புப் பகுதிகளாக மாறக்கூடாது எனத் தெரிவித்துள்ளார்.
மக்கா கூட்டு பாதுகாப்பு ஒப்பந்தம்
துருக்கி, சவுதி அரேபியா மற்றும் பாகிஸ்தான் ஆகிய நாடுகளுக்கு இடையில் கடந்த மாதம் கையெழுத்திடப்பட்ட மக்கா கூட்டு பாதுகாப்பு ஒப்பந்தம் தொடர்பிலும் பாகிஸ்தான் பிரதமர் விளக்கமளித்தார்.
இந்த ஒப்பந்தம் எந்தவொரு நாட்டையும் இலக்காகக் கொண்டதல்ல எனக் குறிப்பிட்ட அவர், பிராந்தியத்தில் பாதுகாப்பு, ஸ்திரத்தன்மை மற்றும் அமைதியை உறுதிப்படுத்துவதற்கான கூட்டு அர்ப்பணிப்பாகவே இந்த ஒப்பந்தம் அமைந்துள்ளதாகத் தெரிவித்தார்.
இந்தியா–பாகிஸ்தான் இடையிலான சிந்து நதி நீர் ஒப்பந்தம் தொடர்பிலும் ஷெஹ்பாஸ் ஷரீப் தனது நிலைப்பாட்டை வெளிப்படுத்தினார்.
நீர் ஒருபோதும் ஆயுதமாக்கப்படக் கூடாது எனத் தெரிவித்த அவர், பாகிஸ்தானுக்குரிய நீரைத் தடுத்து நிறுத்தவோ, திசைதிருப்பவோ அல்லது அதன் ஓட்டத்தைத் தடுக்கவோ மேற்கொள்ளப்படும் எந்தவொரு முயற்சியும் “போர் நடவடிக்கையாகக் கருதப்படும்” என எச்சரித்தார்.
கடந்த ஆண்டு இந்திய நிர்வாகத்தின் கீழுள்ள காஷ்மீரில் இடம்பெற்ற தாக்குதலில் 26 பேர் கொல்லப்பட்டதைத் தொடர்ந்து, இந்தியா பாகிஸ்தானுடன் நீர்த் தரவுகளைப் பகிர்வதை நிறுத்தியதாகக் குறிப்பிடப்படுகிறது.
பிராந்தியத்தில் அதிகரித்து வரும் பதற்றங்களுக்கு மத்தியில், இராஜதந்திர முயற்சிகள் மற்றும் முக்கிய சர்வதேச கடல்வழிகளின் பாதுகாப்பின் அவசியத்தை பாகிஸ்தான் பிரதமர் தனது உரையில் வலியுறுத்தியுள்ளார்.
| செய்திகளை உடனுக்குடன் தெரிந்து கொள்ள IBC தமிழ் WHATSAPP CHANNEL இல் இணைந்து கொள்ளுங்கள்…! |
