வயலில் டெக்னாலஜி புகுந்தாச்சு… ட்ரோன் முதல் சோலார் வரை – மதுரையில் பிரமாண்ட வேளாண் கண்காட்சி | Agriculture News (விவசாய செய்திகள்)

மதுரை IDA ஸ்கடர் வர்த்தகக் கண்காட்சி அரங்கில் நடைபெறும் இந்த நிகழ்வில், விவசாயிகளுக்குத் தேவையான வேளாண் உபகரணங்கள், விதைகள், உரங்கள், பாசனக் கருவிகள், பம்புகள், குழாய்கள் உள்ளிட்ட பல்வேறு பொருட்கள் இடம்பெற்றுள்ளன. இயற்கை வேளாண்மை, பசுமைக்குடில் விவசாயம், நாற்றங்கால், கால்நடை மற்றும் பால் பண்ணை தொடர்பான பொருட்களும் காட்சிப்படுத்தப்பட்டுள்ளன. இதன் மூலம் விவசாயம் சார்ந்த பல்வேறு தேவைகளுக்கான தகவல்களை ஒரே இடத்தில் தெரிந்துகொள்ளும் வாய்ப்பு உள்ளது.

இந்தக் கண்காட்சியில் டிராக்டர்கள், விவசாய இயந்திரங்கள் மற்றும் நவீன பண்ணை கருவிகளுடன், ட்ரோன் தொழில்நுட்பம், ஸ்மார்ட் விவசாய முறைகள், சூரிய சக்தி மற்றும் புதுப்பிக்கத்தக்க எரிசக்தி சார்ந்த தீர்வுகளும் காட்சிப்படுத்தப்பட்டுள்ளன. விவசாயத்தில் தொழில்நுட்பத்தைப் பயன்படுத்த விரும்புபவர்களுக்கு புதிய கருவிகள் மற்றும் அவற்றின் பயன்பாடுகளை நேரடியாகத் தெரிந்துகொள்ளும் வகையில் ஏற்பாடுகள் செய்யப்பட்டுள்ளன.

அறுவடைக்குப் பிறகு விளைபொருட்களைக் கையாளுதல், பதப்படுத்துதல் மற்றும் சந்தைப்படுத்துதல் தொடர்பான தொழில்நுட்பங்களும் கண்காட்சியில் இடம்பெற்றுள்ளன. மேலும், நவீன இயந்திரங்களின் செயல்முறை விளக்கங்கள், புதிய பொருட்கள் குறித்த அறிமுகங்கள் மற்றும் வேளாண்மை சார்ந்த கருத்துப் பரிமாற்றங்களுக்கும் வாய்ப்பு ஏற்படுத்தப்பட்டுள்ளது. விவசாயிகள் மட்டுமின்றி வேளாண் தொழில்முனைவோர், விற்பனையாளர்கள், ஆராய்ச்சியாளர்கள் மற்றும் வேளாண் துறை சார்ந்தவர்கள் என அனைவருக்கும் பயன்படக்கூடிய வகையில் இந்த கண்காட்சி அமைந்துள்ளது.

செப்டம்பர் 18-ம் தேதி தொடங்கிய யுனைடெட் அக்ரிடெக் 2026 கண்காட்சி, செப்டம்பர் 20-ம் தேதி வரை மதுரை IDA ஸ்கடர் வர்த்தகக் கண்காட்சி அரங்கில் நடைபெறுகிறது. விவசாயத்திற்குத் தேவையான பாரம்பரிய கருவிகள் முதல் நவீன தொழில்நுட்பங்கள் வரை பல்வேறு அம்சங்களை ஒரே இடத்தில் இந்த கண்காட்சி வழங்குகிறது.