பகாங் மாநிலம் ஜெங்காவில் உள்ள தனது வளாகத்தில் நடைபெற்ற சவால் போட்டியில் (endurance challenge) பங்கேற்ற ஒரு மாணவர் உயிரிழந்ததாலும், மேலும் எட்டு பேர் மருத்துவமனையில் அனுமதிக்கப்பட்டதாலும், அப்போட்டியின் அனைத்து அம்சங்களையும் மறுஆய்வு செய்யவிருப்பதாக யுனிவர்சிட்டி டெக்னாலஜி மாரா (UiTM) தெரிவித்துள்ளது. Komander Kesatria Endurance Challenge போட்டிக்காக மேற்கொள்ளப்பட்ட பாதுகாப்பு நடைமுறைகள், உடல்நலப் பரிசோதனைகள், இடர் மேலாண்மை மற்றும் அவசரக்கால நடவடிக்கைகள் ஆகியவற்றை பல்கலைக்கழகம் மறுஆய்வு செய்யும் என்று UiTM துணைவேந்தர் ஷஹ்ரின் சாஹிப் @ சாஹிபுதீன் கூறியதாக ‘சினார் ஹரியான்’ செய்தி வெளியிட்டுள்ளது.
நிகழ்ச்சியின் அனைத்து அம்சங்களையும் மறுஆய்வு செய்யும் அதே வேளையில், அதிகாரிகள் மேற்கொள்ளும் விசாரணைகளுக்குப் பல்கலைக்கழகம் முழு ஒத்துழைப்பை வழங்கும் என்று அவர் ஒரு அறிக்கையில் தெரிவித்தார். மாணவர்களின் பாதுகாப்பு, உடல்நலம் மற்றும் நலன் ஆகியவற்றில் எந்தவித சமரசமும் செய்துகொள்ளக் கூடாது என்பதை வலியுறுத்திய ஷஹ்ரின், தனது செயல்பாடுகளை மேம்படுத்தவும் வலுப்படுத்தவும் UiTM தகுந்த நடவடிக்கைகளை எடுக்கும் என்றும் கூறினார்.
இப்போட்டியில் பங்கேற்ற 21 வயதான ஃபத்லான் ஃபக்ரி சோலானா ஃபெல்லிமல் (Fadhlan Fakhry Solana Fellimal) என்ற மாணவர், நேற்று மதியம் தெமெர்லோவில் உள்ள சுல்தான் ஹாஜி அகமது ஷா மருத்துவமனையில் உயிரிழந்தார். ஃபத்லானைத் தவிர, மற்றொரு மாணவரும் அதே மருத்துவமனையில் சிகிச்சை பெற்றார். மேலும் ஏழு பேர் ஜெங்கா மருத்துவமனையில் சிகிச்சை பெற்றனர்.
இப்போட்டியில் பங்கேற்றபோது மாணவர்களுக்கு ஆக்சிஜன் பற்றாக்குறை உள்ளிட்ட வெப்பம் தொடர்பான பாதிப்புகள் ஏற்பட்டதாக முதற்கட்ட விசாரணையில் தெரியவந்துள்ளதாக மாரான் (Maran) காவல் துறைத் தலைவர் வோங் கிம் வாய் முன்னதாகத் தெரிவித்திருந்தார். இதற்கிடையில், ‘சினார் ஹரியான்’ தகவலின்படி, ஜெங்காவில் உள்ள UiTM கிளை நிர்வாகம், ஃபத்லானின் குடும்பத்தினருக்கு முழுமையான உதவிகளை வழங்குவதாகத் தெரிவித்துள்ளது. இன்று திட்டமிடப்பட்டிருந்த அனைத்து வெளிப்புற நடவடிக்கைகளையும் ரத்து செய்ய ஏற்பாட்டாளர்கள் முடிவு செய்துள்ளதாக ஜெங்கா வளாக நிர்வாகம் கூறியது.
மேலும், கடுமையான உடல்நலம் மற்றும் பாதுகாப்புக்கான நிலையான செயல்பாட்டு நடைமுறைகளைப் (SOPs) பின்பற்றியே இத்திட்டம் நடத்தப்பட்டதாகவும், இதில் பங்கேற்பாளர்கள் நிகழ்ச்சி தொடங்குவதற்கு முன்பும், ஒவ்வொரு செயல்பாட்டிற்கு முன்பும் உடல்நலப் பரிசோதனைகளுக்கு உட்படுத்தப்பட்டதாகவும் அது மேலும் தெரிவித்தது.
