International
oi-Shyamsundar I
மதீனா: சவூதி அரேபியாவின் புனித நகரமான மதீனாவில் உள்ள உலகப் புகழ்பெற்ற இஸ்லாமிக் பல்கலைக்கழகத்தில் (Islamic University of Madinah) ஒரு வரலாற்றுச் சிறப்புமிக்க நிகழ்ச்சி நடைபெற்றது. பல்கலைக்கழக வளாகத்தில் அமைந்துள்ள ‘அல் சலாம்’ அரங்கத்தில், நபிகள் நாயகத்தின் பொன்மொழிகள் அடங்கிய ‘முஸ்னத் அஹமது’ என்ற புகழ்பெற்ற ஹதீஸ் தொகுப்பின் தமிழ் மொழிபெயர்ப்பு (பாகம் 8) நூல் வெளியீட்டு விழா மிகவும் சிறப்பாக நடைபெற்றது.
இந்த மகத்தான தமிழ் மொழிபெயர்ப்புப் பணியை, தமிழகத்தின் சென்னையைச் சேர்ந்த ‘ஆலிம் பப்ளிகேஷன் பவுண்டேஷன்’ (Aalim Publication Foundation) செய்து வெளியிட்டுள்ளது. இந்த விழாவில் சவூதி அரேபியாவின் முக்கிய மார்க்க அறிஞர்கள், பேராசிரியர்கள், கல்வியாளர்கள் மற்றும் சமுதாயப் பிரமுகர்கள் பலரும் கலந்துகொண்டு சிறப்பித்தனர்.
மதீனா பல்கலைக்கழக நூலகத்தில் முதல் தமிழ் நூல்:
இந்த நிகழ்வின் மிக முக்கிய சிறப்பம்சமாக, மொழிபெயர்க்கப்பட்ட இந்த ‘முஸ்னத் அஹமது’ நூல் மதீனா இஸ்லாமிக் பல்கலைக்கழகத்தின் தலைமை நூலகத்தில் மக்கள் பார்வைக்காக வைக்கப்பட்டுள்ளது. உலகப் புகழ்பெற்ற இந்த மதீனா பல்கலைக்கழக நூலகத்தில் இடம்பெற்ற “முதல் தமிழ் மொழிபெயர்ப்பு நூல்” என்ற மிகப்பெரிய வரலாற்றுப் பெருமையை இது பெற்றுள்ளது.
தலைமை முஅத்தின் வாழ்த்து:
இதனைத் தொடர்ந்து, இந்த நூலின் சிறப்புப் பிரதி ஒன்று மதீனா மஸ்ஜிதே நபவி பள்ளியின் தலைமை முஅத்தின் அல் இயாது அஹமது சுக்ரியா அவர்களிடம் நேரில் வழங்கி வாழ்த்து பெறப்பட்டது.
ஆலிம் பப்ளிகேஷன் பவுண்டேஷனின் முக்கிய நிர்வாகிகளான ‘புரபஷனல் கொரியர்’ அஹமது மீரான், சென்னை அண்ணாநகர் மஸ்ஜித் ஜாவித் பள்ளிவாசல் தலைவர் முஹம்மது யூசுப் மற்றும் ஜிப்ரிகாஸிம் ஆகியோர் நேரில் சென்று தலைமை முஅத்தினைச் சந்தித்தனர்.
நூலைப் பெற்றுக்கொண்ட தலைமை முஅத்தின், “இது அழியாத நிலையான தர்மம் (ஸதகத்துல் ஜாரியா)” என்று மனதாரப் பாராட்டினார். நபிகளாரின் பொன்மொழிகள் தமிழ் போன்ற பிராந்திய மொழிகளிலும் மொழிபெயர்க்கப்பட்டு மக்களிடம் செல்வதை அறிந்து தனது மகிழ்ச்சியைத் தெரிவித்தார். மேலும், இந்த நூலின் மற்ற பாகங்களும் மிக விரைவில் வெளிவர இறைவனிடம் பிரார்த்தனை செய்வதாகவும் கூறினார். இந்தச் சந்திப்பு தங்களுக்கு மிகுந்த நெகிழ்ச்சியையும் உற்சாகத்தையும் அளித்ததாக நிர்வாகிகளும் தெரிவித்தனர்.
