மகளிர் அணி கேப்டன் பதவியிலிருந்து ஹர்மன்பிரீத் கவுர் விலகல்! புதிய அணித் தலைவர் யார்? | கிரிக்கெட் செய்திகள்

இந்திய மகளிர் கிரிக்கெட் அணியின் நீண்டகால கேப்டனாகச் செயல்பட்டு வந்த ஹர்மன்பிரீத் கவுர், அனைத்து வடிவக் போட்டிகளிலிருந்தும் கேப்டன் பதவியில் இருந்து விலகுவதாக அதிகாரப்பூர்வமாக அறிவித்துள்ளார்.

குவஹாத்தியில் பிசிசிஐ (BCCI) செயலாளர் தேவஜித் சைக்கியா தலைமையில் நடைபெற்ற ஆய்வுக் கூட்டத்திற்குப் பிறகு இந்த முடிவு வெளியானது. இக்கூட்டத்தில் ஹர்மன்பிரீத் கவுர், துணை கேப்டன் ஸ்மிருதி மந்தனா மற்றும் தலைமைப் பயிற்சியாளர் அமோல் முஜும்தார் ஆகியோர் கலந்துகொண்டனர்.

தனது விலகல் குறித்து இன்ஸ்டாகிராம் பக்கத்தில் உணர்ச்சிப்பூர்வமாக ஹர்மன்பிரீத் கவுர் கூறியிருப்பதாவது-

“கேப்டனாக எனது கடமையை முழுமையாக நிறைவேற்றிவிட்டேன். ஒரு கேப்டனாக இந்த அணியை வழிநடத்தியதில் பெருமையடைகிறேன். இனி மீண்டும் கிரிக்கெட் மீதான காதலுக்காக மட்டுமே விளையாடத் தயாராக இருக்கிறேன். இத்தீர்மானம் எளிதானது அல்ல; எனது இரத்தம், வேர்வை, நேரம் மற்றும் எனது சொந்த ஆட்டத்தின் இலக்குகளைத் தியாகம் செய்து இந்த அணிக்காக உழைத்துள்ளேன்” என்று தெரிவித்துள்ளார்.

2016-இல் இந்திய T20I அணியின் கேப்டனாகப் பொறுப்பேற்ற ஹர்மன்பிரீத், 2022-இல் ஒருநாள் போட்டிகளுக்கும், 2023-இல் அனைத்து வடிவப் போட்டிகளுக்கும் கேப்டனாக நியமிக்கப்பட்டார். இவரது தலைமையில் இந்திய அணி கடந்த ஆண்டு ஒருநாள் உலகக்கோப்பையை முதன்முறையாகக் கைப்பற்றி வரலாற்றுச் சாதனை படைத்தது. மேலும், ஆசிய விளையாட்டுப் போட்டிகளில் தொடர்ந்து இரண்டாவது முறையாகத் தங்கப் பதக்கத்தையும் வென்றது. இதுவரை 5 டெஸ்ட், 51 ஒருநாள் மற்றும் 155 T20 போட்டிகளில் இந்திய அணியை இவர் வழிநடத்தியுள்ளார்.

சமீபத்தில் நடைபெற்ற T20 உலகக்கோப்பையில் இந்திய அணி அரைஇறுதிக்கு முன்னேறத் தவறியதைத் தொடர்ந்து, கேப்டன் மாற்றத்திற்கான குரல்கள் எழுந்தன. முன்னாள் வீராங்கனை டயானா எடுல்ஜி உட்பட பலர் துணை கேப்டன் ஸ்மிருதி மந்தனாவை கேப்டனாக நியமிக்க வேண்டும் என வலியுறுத்தி வந்தனர். நீண்டகாலமாகத் துணை கேப்டனாகச் செயல்பட்டு வரும் ஸ்மிருதி மந்தனா, அடுத்த கேப்டனாகப் பொறுப்பேற்பார் என்று எதிர்பார்க்கப்படுகிறது.