ஏர்பஸ் நிறுவன ஒப்பந்தப் பரிவர்த்தனை தொடர்பான பணமோசடி விசாரணைகள் தொடர்பாகக் குற்றப் புலனாய்வுத் திணைக்களத்தால் (CID) கைது செய்யப்பட்ட நாடாளுமன்ற உறுப்பினர் நாமல் ராஜபக்சவை நீதிவான் பசன் அமரசேன பிணையில் விடுவித்து உத்தரவிட்டுள்ளார்.
இதற்கமைய, சந்தேகநபரை 5 இலட்சம் ரூபாய் ரொக்கப் பிணையிலும், தலா 100 மில்லியன் (10 கோடி) ரூபாய் வீதம் இரண்டு சரீரப் பிணைகளிலும் விடுதலை செய்ய நீதிவான் உத்தரவிட்டுள்ளார்.
மேலும், பிணையாளிகள் தங்களது சொந்த கிராம உத்தியோகத்தரிடமிருந்து பெறப்பட்ட சான்றித்டுகளைச் சமர்ப்பிக்க வேண்டுமெனவும் நீதிவான் பணித்துள்ளார். அத்துடன், சந்தேகநபரின் வெளிநாட்டுப் பயணத்திற்கும் தடை விதிக்கப்பட்டுள்ளது.
சாட்சிகளை அச்சுறுத்தவோ அல்லது செல்வாக்கு செலுத்தவோ முயற்சிக்கக் கூடாது என எச்சரித்துள்ள நீதிவான், அவ்வாறு மீறினால் பிணை ரத்து செய்யப்படும் எனவும் அறிவித்துள்ளார். குறித்த வழக்கு விசாரணை எதிர்வரும் அக்டோபர் 14 ஆம் திகதி மீண்டும் எடுத்துக்கொள்ளப்படவுள்ளது.
