தினமும் ஒரு ரொட்டி சாப்பிட்டு உயிர் வாழ்ந்த நபர், இன்று பல கோடி மதிப்புள்ள பேக்கரியின் அதிபர்; யார் அவர்?

99 பேன்கேக்ஸ் (99 Pancakes) நிறுவனர் விகேஷ் ஷாவின் பயணம், கட்டுக்கடங்காத ஆர்வம் மற்றும் விடாமுயற்சிக்கு சிறந்த சான்றாகும். தனது குடும்பத்தை ஆதரிப்பதற்காக தொழில்முனைவோர் பயணத்தைத் தொடங்கினார் விகேஷ் ஷா. மனஉறுதி, எதற்கும் கலங்காத கடின உழைப்பு இதுதான் அவரது ஒரே நம்பிக்கையாக இருந்தது. உணவுத் துறையில் பல்வேறு வணிக முயற்சிகளை மேற்கொள்ள அவரை இதுவே வழிநடத்தியது என்றுகூட சொல்லலாம்.

விகேஷ் ஷாவுக்கு ஐந்து வயதாக இருக்கும்போது, அவரது தந்தை பங்குச் சந்தையில் பெரும் நஷ்டத்தை சந்தித்தார். இதனால் அவரது குடும்பம் பெரும் நிதி நெருக்கடியில் சிக்கித் தவித்தது. இதன் காரணமாக அப்போது 10-ம் வகுப்பு படித்துக் கொண்டிருந்த விகேஷ், தனது குடும்பத்தை காப்பாற்றுவதற்காக பகுதிநேர வேலை செய்யத் தொடங்கினார்.

1998-ம் ஆண்டில், நவபாரத் டைம்ஸ் அறிக்கையின்படி, பேக்கரி வேலையை விட்டு நின்றார் விகேஷ் ஷா. அதன்பிறகு கிட்டத்தட்ட ஒரு மாதம், மலிவான பன்களை சாப்பிட்டு உயிர் பிழைத்தார். பின்னர் 1999-ம் ஆண்டில், ஒரு நண்பரின் உதவியுடன் ‘பேக் பாயிண்ட்’ என்ற நிறுவனத்தை தொடங்கினார். B2B மாதிரியில் உருவாக்கப்பட்ட ‘பேக் பாயிண்ட்’, மும்பையில் உள்ள கேட்டரிங் நிறுவனங்களுக்கு இனிப்பு வகைகள் மற்றும் பேஸ்ட்ரிகளை வழங்கி வந்தது. 2009-ம் ஆண்டில், ‘ஹேப்பினஸ் டெய்லி’ என்ற கேக் கடையைத் திறந்து விகேஷ் மற்றொரு மைல் கல்லைப் படைத்தார்.

ஜூன் 2017-ம் ஆண்டு, விகேஷ் ரூ.9 லட்சம் முதலீட்டில் ’99 பேன்கேக்ஸ்’ என்ற நிறுவனத்தைத் தொடங்கினார். இந்தக் கடையை தொடங்குவதற்கு பின்னால் சுவாரஸ்யமான சம்பவம் ஒன்றுள்ளது. அதாவது ஒருமுறை விகேஷ் ஷா ஆம்ஸ்டர்டாமிற்குச் சென்றபோது, அங்கு சாலையோர விற்பனையாளர் ஒருவர் பேன்கேக் தயாரிப்பதைப் பார்த்தபோது நாமும் இதேபோல் தொடங்கலாம் என்று யோசனை பிறந்துள்ளது.