ஜோகூர் மாநிலத்தின் வீடமைப்பு உதவித் திட்டத்தின் முதல் ஆறு கட்டங்களின் வழியாக 21,236 பேர் பயனடைந்துள்ளனர். இதற்காக மொத்தம் 8 கோடியே 41 லட்சத்து 90 ஆயிரத்து 500 வெள்ளி ஒதுக்கப்பட்டுள்ளதாக மாநில வீடமைப்பு, ஊராட்சி ஆட்சிக்குழு உறுப்பினர் டத்தோ ஜஃப்னி தெரிவித்தார். லார்கின் அரேனா அரங்கில் நடைபெற்ற இத்திட்டத்தின் ஆறாம் கட்ட உதவி வழங்கும் நிகழ்வை ஜோகூர் மந்திரி பெசார் டத்தோ ஓன் ஹஃபிஸ் காஸி நிறைவுசெய்ததாக அவர் தமது அறிக்கையில் குறிப்பிட்டார்.
ஆறாம் கட்டத்தில் மட்டும் 6,110 பயனாளிகளுக்காக 2 கோடியே 42 லட்சத்து 15 ஆயிரம் வெள்ளி ஒதுக்கப்பட்டுள்ளது. இதில் வீடு வாங்குவதற்கான உதவியை 3,700 பேரும், புதிய வீட்டில் குடியேறுவதற்கான உதவியை 620 பேரும், வாடகை வீட்டு உதவியை 1,790 பேரும் பெறுகின்றனர் என்று அவர் கூறினார். வீடு வாங்குவோருக்கு 5,000 வெள்ளி, புதிய வீட்டில் குடியேறுவோருக்கு 2,000 வெள்ளி, வாடகை வீட்டில் வசிப்போருக்கு 2,500 வெள்ளி வழங்கப்படுகிறது. குடும்பங்களின் வெவ்வேறு வீடமைப்புத் தேவைகளைக் கருத்தில்கொண்டு இந்த உதவிகள் ஏற்பாடு செய்யப்பட்டுள்ளதாக அவர் விளக்கினார்.
“வீட்டின் சாவியைப் பெற்றுவிட்டதால் ஒரு குடும்பத்தின் அனைத்துச் சுமைகளும் முடிந்துவிடுவதில்லை. குடியேறும் செலவுகளும் அன்றாட வாழ்க்கைச் செலவுகளும் அவர்களுக்கு இருக்கின்றன. அதேவேளையில், வாடகை வீட்டில் வசிக்கும் குடும்பங்களின் தேவைகளையும் கவனிக்க வேண்டும்,” என்று ஜஃப்னி தெரிவித்தார். முதல் கட்டத்தில் 1,020 பேர், இரண்டாம் கட்டத்தில் 2,506 பேர், மூன்றாம் கட்டத்தில் 600 பேர், நான்காம் கட்டத்தில் 5,000 பேர், ஐந்தாம் கட்டத்தில் 6,000 பேர் பயனடைந்துள்ளனர். ஆறாம் கட்டத்தில் மேலும் 6,110 பேருக்கு உதவி வழங்கப்படுவதன் வழியாக இத்திட்டத்தின் பயன் விரிவடைந்துள்ளதாக அவர் கூறினார்.
மந்திரி பெசாரின் முன்முயற்சியில் உருவான இத்திட்டம், மக்களின் வீடமைப்புச் சுமையைக் குறைப்பதற்கு மாநில அரசு அளிக்கும் முன்னுரிமையை வெளிப்படுத்துவதாகவும் அவர் குறிப்பிட்டார். இதனிடையே, ஜோகூர் வாங்கும் சக்திக்கேற்ற வீடமைப்புத் திட்டத்தின்கீழ் 2022ஆம் ஆண்டு முதல் 2026ஆம் ஆண்டின் மூன்றாம் காலாண்டுவரை 25,791 வீடுகள் கட்டி முடிக்கப்பட்டுள்ளதாக ஜஃப்னி தெரிவித்தார். எஞ்சிய 4,209 வீடுகளை நான்காம் காலாண்டில் முடித்து, 2022–2026 காலத்திற்கான 30,000 வீடுகள் இலக்கை அடையத் திட்டமிடப்பட்டுள்ளது. தொடர்ந்து கூடுதலாக 70,000 வீடுகளை அமைத்து, 2030ஆம் ஆண்டுக்குள் மொத்தம் ஒரு லட்சம் வீடுகளை வழங்குவதே இலக்கு என்று அவர் கூறினார்.
இளம் தம்பதியரும் நீண்டகாலமாக வாடகை வீட்டில் வசிக்கும் குடும்பங்களும் சொந்த வீடு பெறுவதற்கான வாய்ப்பை விரிவுபடுத்த இந்த முயற்சி தொடரும் என்றார் அவர்.உதவி கிடைக்காத விண்ணப்பங்களில் முழுமையற்ற ஆவணங்கள், விற்பனை–கொள்முதல் ஒப்பந்தத் தேதி, சாவி ஒப்படைப்புத் தேதி தொடர்பான சிக்கல்கள், ஏற்கெனவே வீடு வைத்திருத்தல், தகுதி நிபந்தனைகளைப் பூர்த்திசெய்யாமை ஆகியவை அடையாளம் காணப்பட்டுள்ளதாகவும் அவர் விளக்கினார். விண்ணப்பங்களின் நிலையை மக்களுக்குத் தெளிவாக விளக்குவதோடு, ஆவணச் சரிபார்ப்பையும் கவனமாக மேற்கொள்ள வேண்டும். ஒவ்வொரு விண்ணப்பத்திற்குப் பின்னாலும் வாழ்க்கைச் சுமையைக் குறைக்க எதிர்பார்க்கும் ஒரு குடும்பம் இருப்பதை உணர்ந்து செயல்பட வேண்டும் என்று ஜஃப்னி வலியுறுத்தினார்.
கோகி கருணாநிதி
