Last Updated:
இறுதி வெளியீட்டு அளவு மற்றும் முதலீட்டாளர்களின் பங்களிப்பு குறித்த அறிவிப்புகள் விரைவில் வெளியாகும் என எதிர்பார்க்கப்படுகிறது.
ஜியோ பிளாட்ஃபார்ம்ஸ் நிறுவனத்தின் வரவிருக்கும் ஐபிஓ Initial Public Offering – தொடக்கப் பங்கு வெளியீடு குறித்த முக்கிய தகவல்கள் தற்போது வெளியாகியுள்ளன. ரிலையன்ஸ் இண்டஸ்ட்ரீஸ் நிறுவனத்தின் டிஜிட்டல் சேவைகள் பிரிவான ஜியோ பிளாட்ஃபார்ம்ஸ், இந்தியாவின் மிகப்பெரிய பங்கு விற்பனையாக அமையக்கூடிய இந்த ஐபிஓ-விற்காக இதுவரை 20 பில்லியன் டாலருக்கும் அதிகமான தொகையை (இந்திய மதிப்பில் சுமார் ரூ.1.68 லட்சம் கோடி) ஏலங்களாக ஈர்த்துள்ளதாகப் புகழ்பெற்ற ப்ளூம்பெர்க் (Bloomberg) செய்தி நிறுவனம் தெரிவித்துள்ளது.
இந்த ஐபிஓ-வில் முதலீடு செய்ய ஃபிடெலிட்டி (Fidelity), அலையன்ஸ் (Allianz) மற்றும் கேப்பிட்டல் குரூப் (Capital Group) உள்ளிட்ட பல முக்கிய உலகளாவிய முதலீட்டாளர்களும், பல்வேறு பன்னாட்டு மற்றும் உள்நாட்டு நிறுவனங்களும் தங்களது தீவிர ஆர்வத்தைத் வெளிப்படுத்தியுள்ளன.
எனினும், இது குறித்த இறுதித் தகவல்கள் இன்னும் முழுமையாக வெளிவரவில்லை. மேலும், ஆங்கர் முதலீட்டாளர்களின் (Anchor Investors) இறுதிப் பட்டியல் மற்றும் ஒதுக்கீடு குறித்த முடிவுகள் வரவிருக்கும் நாட்களில் தீர்மானிக்கப்படும் என்று எதிர்பார்க்கப்படுகிறது. இந்த ஐபிஓ செயல்முறை தற்போது தீவிரமாக நடைபெற்று வருவதால், இறுதிக் கட்ட முடிவுகள் இன்னும் எடுக்கப்படவில்லை.
இந்த ஐபிஓ வெளியீட்டின் மூலம் ஜியோ பிளாட்ஃபார்ம்ஸ் நிறுவனம் 10.3 லட்சம் கோடி ரூபாய் வரை, அதாவது தோராயமாக 108 பில்லியன் டாலர் மதிப்பீட்டை இலக்காகக் கொண்டுள்ளது. முன்னதாக இந்த மதிப்பீடு 170 பில்லியன் டாலர் வரை எட்டக்கூடும் என எதிர்பார்க்கப்பட்ட நிலையில், தற்போதைய மதிப்பீட்டு இலக்கு அதைக் காட்டிலும் குறைவாக நிர்ணயிக்கப்பட்டுள்ளது. நிறுவனத்தின் வளர்ச்சி வாய்ப்புகள் மற்றும் எதிர்பார்க்கப்படும் வருமானத்தை மதிப்பிடும்போது, இந்த உத்தேசிக்கப்பட்ட மதிப்பீடு முதலீட்டாளர்களுக்கு மிகவும் முக்கியமான காரணியாக அமையும் என்று எதிர்பார்க்கப்படுகிறது.
ஜியோ பிளாட்ஃபார்ம்ஸின் நிர்வாக இயக்குநரான ஆகாஷ் அம்பானி, இந்த ஐபிஓ தயாரிப்புப் பணிகள் மற்றும் முதலீட்டாளர் சந்திப்புகளைத் தலைமையேற்று நடத்தி வருகிறார். கடந்த சில வாரங்களாக ஹாங்காங், லண்டன் மற்றும் நியூயார்க் போன்ற உலகின் முக்கிய நிதி மையங்களுக்குச் சென்று உலகளாவிய முதலீட்டாளர்களை அவர் நேரில் சந்தித்துப் பேசி உள்ளார்.
இந்தச் சந்திப்புகளின்போது, நிறுவனத்தின் இலக்கு வைக்கப்பட்ட மதிப்பீடு குறித்தும், அதன் டிஜிட்டல் சேவைகள் மற்றும் தளங்களை monetise செய்வது (பணமாக்குவது) குறித்த திட்டங்கள் குறித்தும் முதலீட்டாளர்கள் பல கேள்விகளை எழுப்பியுள்ளனர். பயனர்களின் எண்ணிக்கையை எவ்வாறு நிலையான வருவாய் வளர்ச்சி மற்றும் லாபமாக மாற்றுவது என்பதை முதலீட்டாளர்கள் உன்னிப்பாக கவனித்து வருகின்றனர்.
இந்தியாவின் தொலைத்தொடர்பு மற்றும் டிஜிட்டல் பொருளாதாரத்தில் ஜியோவின் அசைக்க முடியாத ஆதிக்கம் காரணமாக, இந்த ஐபிஓ உள்ளூர் மற்றும் உலகளாவிய நிறுவன முதலீட்டாளர்களின் மிகப்பெரிய கவனத்தை ஈர்த்துள்ளது. ரிலையன்ஸ் ஜியோவின் தொலைத்தொடர்பு வணிகம் மற்றும் பல்வேறு டிஜிட்டல் செயலிகளை அடிப்படையாகக் கொண்டு இந்நிறுவனம் இயங்குகிறது.
இணைப்புக் சேவைகளைத் தாண்டி, இந்த டிஜிட்டல் வழித்தடங்கள் மூலம் வருமானம் ஈட்டும் திறனை முதலீட்டாளர்கள் முக்கியமாகக் கருதுகின்றனர். திட்டமிட்டபடி இந்த ஐபிஓ வெற்றிகரமாக நிறைவடைந்தால், அது இந்தியாவின் பங்குச் சந்தை வரலாற்றில் புதிய சாதனையைப் படைக்கும். இறுதி வெளியீட்டு அளவு மற்றும் முதலீட்டாளர்களின் பங்களிப்பு குறித்த அறிவிப்புகள் விரைவில் வெளியாகும் என எதிர்பார்க்கப்படுகிறது.
