சென்னை சூப்பர் கிங்ஸ் – மும்பை இந்தியன்ஸ் போட்டி..! ஒரு மணி நேரத்தில் விற்றுத்தீர்ந்த ஐபிஎல் போட்டி டிக்கெட்டுகள்..!

இந்தியாவின் கிரிக்கெட் திருவிழாவான ஐபிஎல் கிரிக்கெட் போட்டிகள், வரும் 22-ஆம் தேதி தொடங்க உள்ள நிலையில், சென்னை சேப்பாக்கத்தில் 23-ஆம் தேதி சென்னை சூப்பர் கிங்ஸ் மற்றும் மும்பை இந்தியன்ஸ் அணிகள் மோத உள்ளன. ரசிகர்களால் விறுவிறுப்பாக பார்க்கப்படும் சென்னை சூப்பர் கிங்ஸ் – மும்பை இந்தியன்ஸ் அணிகள் மோதும் எல் கிளாசிகோ போட்டிக்கு டிக்கெட்டுகளை முன்பதிவு செய்ய ரசிகர்கள் ஆவலுடன் காத்திருந்தார்கள்.

அறிவிக்கப்பட்டபடி, டிக்கெட் விற்பனை இன்று காலை 10.15 மணிக்குத் தொடங்கியது. ரூ. 1700 தொடங்கி 5 பிரிவுகளாக ரூ.7,500 ரூபாய் வரை டிக்கெட்டுகள் விற்பனை செய்யப்பட்டன. ஒருவர் 2 டிக்கெட்டுகள் தான் வாங்க முடியும் என்பது உள்ளிட்ட விதிமுறைகளுக்கு மத்தியில், ஒரே நேரத்தில் சுமார் 2 லட்சத்துக்கும் மேற்பட்டோர் டிக்கெட் முன்பதிவு செய்ய ஆன்லைனில் காத்திருந்தனர்.

இதனால், பெரும்பாலானவர்கள் டிக்கெட் கிடைக்காமல் ஏமாற்றம் அடைந்தனர். மேலும், ரூ. 1700 ரூபாய் மதிப்பிலான ஒரு டிக்கெட், இணையத்தில் 21,000 ரூபாய்க்கு விற்பனை செய்யப்படுவதாக புகார் எழுந்துள்ளது சர்ச்சையைக் கிளப்பியுள்ளது.