உயிர்த்த ஞாயிறு பயங்கரவாதத் தாக்குதல்கள் தொடர்பான விசாரணையில் மூன்றாவது சந்தேக நபராகப் பெயரிடப்பட்டுள்ள, அரச புலனாய்வு சேவையின் முன்னாள் தலைவர் சுரேஷ் சலே, மனநலப் பிரச்சினைகளால் அவதிப்பட்டு வருவதாக நீதிமன்றில் தெரிவிக்கப்பட்டுள்ளது.
ஜனாதிபதி சட்டத்தரணி ஷவிந்திர பெர்னாண்டோ, தனது கட்சிக்காரரைப்(சுரேஷ் சலே) பரிசோதித்த நீதித்துறை மருத்துவ அதிகாரி சமர்ப்பித்த அறிக்கை தொடர்பாக இன்று(03.06.2026) கொழும்பு கோட்டை நீதவான் நீதிமன்றத்தில் சாட்சியங்களை முன்வைத்தபோது இவ்வாறு தெரிவித்துள்ளார்.
மனச்சோர்வு, அதிர்ச்சிக்குப் பிந்தைய மன அழுத்தக் கோளாறு மற்றும் மனநலப் பிரச்சினைகளால் அவதிப்பட்டு வருகிறார் என்று, சட்டத்தரணி சுட்டிக்காட்டியுள்ளார்.
கடுமையான மன அழுத்தம்
சந்தேக நபர் ஐந்து இடங்களில் சித்திரவதை செய்யப்பட்டதாகவும், அதன் விளைவாக அவர் கடுமையான மன அழுத்தத்திற்கு ஆளானதாகவும் அந்த அறிக்கை குறிப்பிடுவதாக அவர் மேலும் கூறியுள்ளார்.
இதன் விளைவாக சந்தேக நபரான சுரேஷ் சலே உயிரை மாய்த்துக்கொள்ளும் அதிக அபாயத்தில் இருப்பதாக மருத்துவ அறிக்கை சுட்டிக்காட்டுவதாக ஜனாதிபதி சட்ட ஆலோசகர் தெரிவித்துள்ளார்.
சுரேஷ் சலே சார்பாக முன்வைக்கப்பட்ட ஒரு தீர்மானம், கொழும்பு கோட்டை நீதிபதி பாசன் அமரசேன முன்பு இன்று (03) விசாரணைக்கு எடுத்துக்கொள்ளப்பட்டது.
அப்போது, ஜனாதிபதி சட்டத்தரணி ஷவிந்திர பெர்னாண்டோ மேற்கூறிய உண்மைகளை நீதிமன்றத்தின் முன் சமர்ப்பித்தார்.
அப்போது, மனுதாரரிடம் இருந்து வழக்கின் விவரங்களைக் கேட்டறியாமல் உத்தரவு பிறப்பிக்க முடியாது என்று நீதிபதி தெரிவித்தார்.
அதன்படி, இந்த மனுவை நாளை (04) விசாரணைக்கு எடுத்துக்கொள்ளுமாறு உத்தரவிட்ட நீதிபதி, குற்றப் புலனாய்வுத் துறைக்கு நாளை நீதிமன்றத்தில் அதன் விவரங்களைச் சமர்ப்பிக்குமாறு ஒரு அறிவிப்பு அனுப்பப்பட வேண்டும் என்றும் மேலும் தெரிவித்துள்ளார்.
| செய்திகளை உடனுக்குடன் தெரிந்து கொள்ள IBC தமிழ் WHATSAPP CHANNEL இல் இணைந்து கொள்ளுங்கள்…! |
