கல்வி அமைச்சகம் நாடு தழுவிய அளவில் 82,126 ஆசிரியர்களிடம் நடத்திய பரிசோதனையில், 691 ஆசிரியர்களுக்கு அவர்களின் உளவியல் நலனுக்காக உடனடி தலையீடு (intervention) தேவைப்படுவது கண்டறியப்பட்டுள்ளது. நாடாளுமன்றத்தில் எழுத்துப்பூர்வமாக அளித்த பதிலில், கல்வி அமைச்சர் ஃபட்லினா சிடெக், பரிசோதனைக்கு உட்படுத்தப்பட்ட ஆசிரியர்களில் இந்த எண்ணிக்கை 0.84% ஆகும் என்று தெரிவித்தார். ஒட்டுமொத்தமாக, பரிசோதனைக்கு உட்படுத்தப்பட்ட பெரும்பாலான ஆசிரியர்களின் உளவியல் நலம் சிறப்பாகவே உள்ளது.
சவால்களை எதிர்கொள்ளும் ஆசிரியர்களுக்கு உதவும் வகையில், மேம்பாடு, தடுப்பு, மீட்சி ஆகியவற்றை உள்ளடக்கிய விரிவான தலையீட்டு அணுகுமுறையை அமைச்சகம் மேற்கொண்டு வருகிறது. இதற்காக உளவியல் மற்றும் ஆலோசனை சேவைகள் வழங்கப்படுகின்றன. தனிநபர், குழு ஆலோசனை, உளவியல் மதிப்பீடுகள், வழிகாட்டுதல், ஆலோசனை வழங்குதல், அத்துடன் மன அழுத்த மேலாண்மைத் திட்டங்கள், உணர்வுபூர்வமான ஆதரவு போன்றவை இதில் அடங்கும்” என்று அவர் கூறினார்.
முஸ்லிமின் யஹாயா (பெரிக்காத்தான்-சுங்கை பெசார்) எழுப்பிய கேள்விக்கு அவர் பதிலளிக்கையில் இவ்வாறு கூறினார். ஆசிரியர்கள் எதிர்கொள்ளும் உடல்நலப் பிரச்சினைகள், மனநலக் கோளாறுகள் குறித்தும், அவர்கள் தங்கள் வாழ்க்கையையும் பணியையும் தொடர்ந்து முன்னெடுத்துச் செல்ல அமைச்சகம் வழங்கும் ஆதரவு, தலையீட்டு நடவடிக்கைகள் குறித்தும் அவர் கேள்வி எழுப்பியிருந்தார்.
இந்தத் தலையீட்டுச் செயல்முறை, ஆசிரியர்களின் தனிப்பட்ட தேவைகளைக் கண்டறியும் பரிசோதனையுடன் தொடங்கி, அதற்கேற்ற உளவியல் தலையீடு, ஆலோசனைகளை வழங்குவதன் மூலம் தொடர்கிறது என்று ஃபட்லினா விளக்கினார். ஆசிரியர்களின் நலனை மேம்படுத்த, அவர்களின் ஓய்வறைகளை மேம்படுத்துவதற்காக அமைச்சகம் 200 மில்லியன் ரிங்கிட் நிதியை ஒதுக்கியுள்ளது. இதில் 100 மில்லியன் ரிங்கிட் கூடுதல் நிதியாகும்.
கடந்த ஆண்டு, தேசிய ஆசிரியர் பணி சங்கம், பல ஆசிரியர்கள் மனநலப் பிரச்சினைகளை எதிர்கொள்வதாகத் தெரிவித்தது. பள்ளிகளில் நிலவும் ஆரோக்கியமற்ற தலைமைத்துவச் சூழல், டிஜிட்டல் தொழில்நுட்பம் சார்ந்த கூடுதல் பணிச்சுமை மற்றும் பெற்றோரிடமிருந்து வரும் தொல்லைகள் போன்றவற்றால் அவர்கள் உணர்வுபூர்வமான அழுத்தத்திற்கு உள்ளாவதாகச் சுட்டிக்காட்டியது.
ஆசிரியர்கள் மனச்சோர்வு மற்றும் ஸ்கிசோஃப்ரினியா (மனச்சிதைவு நோய்) போன்ற பாதிப்புகளுக்கு உள்ளாவது குறித்த செய்திகள் குறித்து கருத்து தெரிவித்த என்யூடிபி பொதுச் செயலாளர் ஃபௌசி சிங்கோன், அதிகப்படியான ஆசிரியர்கள் தனிமையாகவும், போதிய ஆதரவு இல்லாமலும் உணர்வதாகக் குறிப்பிட்டார். மனநலச் சிக்கல்களால் அவதிப்படும் ஆசிரியர்கள், உதவி கோருவதற்கு அஞ்சுவதாகவும், இது அவர்களின் நிலையை மேலும் மோசமடையச் செய்கிறது என்றும் அவர் கூறினார்.
