சபாநாயகர் ஜகத் விக்ரமரத்னவுக்கு எதிரான நம்பிக்கையில்லாத் தீர்மானம் எதிர்வரும் வெள்ளிக்கிழமை (09) பாராளுமன்றத்தில் முன்வைக்கப்படவுள்ளதாக ஐக்கிய மக்கள் சக்தி பாராளுமன்ற உறுப்பினர் அஜித் பி. பெரேரா தெரிவித்தார்.
இதேவேளை, சபாநாயகருக்கு எதிரான நம்பிக்கையில்லாப் பிரேரணை முன்வைக்கப்பட்ட பின்னர், அடுத்த பாராளுமன்ற வாரத்தில் அதனை விவாதத்திற்கு எடுத்துக்கொள்வதற்கான யோசனையை முன்வைப்பதாக சபை முதல்வரும் அமைச்சருமான பிமல் ரத்நாயக்க தெரிவித்தார்.
செவ்வாய்க்கிழமை (06) பாராளுமன்றம் சபாநாயகர் ஜகத் விக்ரமரத்ன தலைமையில் கூடியதைத் தொடர்ந்து, சபாநாயகர் அறிவித்தலின்போது ஒழுங்குப் பிரச்சினையை முன்வைத்துக் கூறும்போதே, அஜித் பி. பெரேரா எம்.பி. மேற்கண்டவாறு கூறினார்.
அஜித் பி. பெரேரா அங்கு மேலும் தெரிவிக்கையில்,
“என்னால் 2026 ஆகஸ்ட் 20ஆம் திகதி சிறப்புரிமைப் பிரச்சினையொன்று முன்வைக்கப்பட்டது. இதுவரையில் அது தொடர்பில் நடவடிக்கை எடுக்கப்படவில்லை. இந்நிலையில் உங்களுக்கு எதிராக (சபாநாயகருக்கு எதிராக) குற்றச்சாட்டுகள் முன்வைக்கப்படுகின்றன. பாராளுமன்றச் சிறப்புரிமைச் சட்டத்தில் சபாநாயகர் எம்.பியாகவே கருதப்படுகின்றார்.
அவருக்கென விசேட விடுப்புரிமை கிடையாது. ஜனாதிபதிக்கு மட்டுமே அவ்வாறான விடுப்புரிமை உள்ளது. எவ்வாறாயினும், உங்களுடைய அறிவித்தலுக்கமையவே எதிர்வரும் வெள்ளிக்கிழமை நாங்கள் உங்களுக்கு எதிரான நம்பிக்கையில்லாப் பிரேரணையை முன்வைக்கவுள்ளோம். அந்த நம்பிக்கையில்லாப் பிரேரணையில் மேலும் சில விடயங்களையும் உள்ளடக்கி அதனைக் கொண்டுவருவோம்” என்றார்.
இதனைத் தொடர்ந்து எழுந்த சபை முதல்வரும் அமைச்சருமான பிமல் ரத்நாயக்க கூறுகையில்,
“நம்பிக்கையில்லாப் பிரேரணை முன்வைக்கப்பட்ட பின்னர் வரும் முதலாவது பாராளுமன்ற வாரத்திலேயே அதனை விவாதத்திற்கு எடுத்துக்கொள்வதற்கு ஆளுங்கட்சி தரப்பிலிருந்து யோசனையை முன்வைக்கின்றோம்” என்றார்.
