முன்னாள் பிரதியமைச்சர் சரண குணவர்தனவின் மனைவி லக்மந்தி ஹெட்டியாராச்சி, கணவரை சிறையிலிருந்து காப்பாற்ற நீதிமன்ற ஊழியருக்கு இலஞ்சம் வழங்கிய குற்றச்சாட்டில் கைது செய்யப்பட்டுள்ளார்.
சிறைத் தண்டனை விதிக்கப்பட்டுள்ள தனது கணவரைக் காப்பாற்றும் நோக்கில், நீதிமன்ற ஊழியர் ஒருவருக்கு இலஞ்சம் வழங்க முற்பட்ட குற்றச்சாட்டின் பேரில், முன்னாள் பிரதியமைச்சர் சரண குணவர்தனவின் மனைவி லக்மந்தி ஹெட்டியாராச்சி, இலஞ்ச ஊழல் விசாரணை ஆணைக்குழுவினால் இன்று (25) கைது செய்யப்பட்டுள்ளார்.
கொழும்பு மேல் நீதிமன்றத்தில் பணியாற்றும் அலுவலக உதவியாளர் ஒருவருக்கு 50,000 ரூபாயை இலஞ்சமாக வழங்கிய குற்றச்சாட்டின் பேரிலேயே அவர் கைது செய்யப்பட்டுள்ளார்.
தனது கணவருக்கு விதிக்கப்படும் சிறைத் தண்டனையை இடைநிறுத்தப்பட்ட தண்டனையாக மாற்றுவதற்கு உதவி கோரியே, இந்த இலஞ்சத் தொகை வழங்கப்பட்டதாக விசாரணைகளில் தெரிவிக்கப்பட்டுள்ளது.
கொழும்பு மேல் நீதிமன்ற நீதிபதி ஒருவர், இலஞ்ச ஊழல் விசாரணை ஆணைக்குழுவுக்கு வழங்கிய தகவலின் அடிப்படையிலேயே இந்த கைது நடவடிக்கை முன்னெடுக்கப்பட்டுள்ளதுடன், சம்பவம் தொடர்பில் மேலதிக விசாரணைகள் முன்னெடுக்கப்பட்டு வருகின்றன.
முன்னாள் பிரதியமைச்சர் சரண குணவர்தன மீது தொடரப்பட்டிருந்த பல ஊழல் குற்றச்சாட்டுகள் நிரூபிக்கப்பட்டதையடுத்து, கொழும்பு மேல் நீதிமன்றம், அவருக்கு கடந்த ஜூன் மாதம் 16 வருட கடூழிய சிறைத் தண்டனை விதித்து தீர்ப்பளித்திருந்தமை குறிப்பிடத்தக்கது.
