சவூதி அராம்கோ நிறுவனத்தின் சர்வதேச விலை நிர்ணயக் குறியீட்டின்படி (Saudi CP), கடந்த பிப்ரவரி முதல் ஜூன் 2026 வரையிலான காலகட்டத்தில் எல்.பி.ஜி எரிவாயுவின் விலை சுமார் 46 விழுக்காடு வரை உயர்ந்துள்ளது. இதன் காரணமாக இந்தியாவில் ஒரு 14.2 கிலோ எடையுள்ள வீட்டு உபயோக சிலிண்டரை விநியோகம் செய்வதற்கான உண்மையான அடக்க விலை 1,600 ரூபாய்க்கும் அதிகமாக உயர்ந்த போதிலும், அந்தப் பாரத்தை பொதுமக்கள் மீது சுமத்தாமல் மத்திய அரசே பெருமளவில் ஏற்றுக்கொண்டுள்ளது.
தற்போது சர்வதேச சந்தை விலையை விட சுமார் 700 ரூபாய் வரை குறைவாக வீட்டு உபயோக சிலிண்டர்கள் வழங்கப்படுவதால் ஏற்படும் இழப்பை ஈடுகட்ட, பொதுத்துறை எண்ணெய் நிறுவனங்களுக்கு மத்திய அமைச்சரவை 30,000 கோடி ரூபாய் இழப்பீட்டுத் தொகையை அனுமதித்துள்ளது.
இந்த விலை மேலாண்மைத் திட்டத்தின் மூலம் இந்தியாவில் தற்போது சமையல் எரிவாயு சிலிண்டர்கள் சர்வதேச சந்தை விலையை விட 45% முதல் 60% வரையிலான தள்ளுபடி விலையில் நுகர்வோருக்குக் கிடைக்கின்றன. டெல்லியில் பொது நுகர்வோருக்கான சிலிண்டர் விலை 942 ரூபாயாக நிர்ணயிக்கப்பட்டுள்ள வேளையில், பிரதான் மந்திரி உஜ்வாலா யோஜனா திட்டத்தின் கீழ் உள்ள 10.58 கோடிக்கும் அதிகமான ஏழைக் குடும்பங்களுக்கு ஆண்டுக்கு முதல் 4 சிலிண்டர்களுக்கு தலா 300 ரூபாய் நேரடி மானியம் வழங்கப்படுவதால், அவர்களின் பயனுள்ள சிலிண்டர் விலை வெறும் 642 ரூபாயாக மட்டுமே உள்ளது.
அண்டை நாடுகளையும் உலகின் முன்னணி வளர்ந்த நாடுகளையும் ஒப்பிடும் போது இந்தியாவில்தான் சமையல் எரிவாயு விலை மிகவும் குறைவாக உள்ளது என்பது குறிப்பிடத்தக்கது. இந்திய உஜ்வாலா நுகர்வோர் செலுத்தும் 642 ரூபாயுடன் ஒப்பிடுகையில், சிலிண்டரின் விலை பாகிஸ்தானில் 1,046 ரூபாயாகவும் (39% அதிகம்), நேபாளத்தில் 1,207 ரூபாயாகவும் (47% அதிகம்), வங்கதேசத்தில் 1,225 ரூபாயாகவும் (48% அதிகம்), இலங்கையில் 1,241 ரூபாயாகவும் (48% அதிகம்) உள்ளது.
இதேபோல வளர்ந்த வல்லரசு நாடுகளான அமெரிக்காவில் 1,755 ரூபாயாகவும், ஆஸ்திரேலியாவில் 1,765 ரூபாயாகவும், கனடாவில் 2,411 ரூபாயாகவும் சமையல் எரிவாயு விலை மிக அதிகமாக உள்ளது.
மறுபுறம், ஹோட்டல்கள் மற்றும் வணிகங்களுக்குப் பயன்படுத்தப்படும் 19 கிலோ வணிக ரீதியிலான சிலிண்டர் விலை சர்வதேச சந்தை நிலவரப்படி நேரடியாக மாற்றியமைக்கப்பட்டு தற்போது டெல்லியில் 3,113.50 ரூபாயாக விற்பனை செய்யப்படுகிறது.
ஹார்முஸ் நீரிணையில் ஏற்பட்ட மோதல் சூழலால் உலகளாவிய கப்பல் போக்குவரத்து முடங்கியபோதும், இந்தியா தனது சாதுரியமான தூதரக மற்றும் பாதுகாப்பு ஒருங்கிணைப்புகள் மூலம் இந்தியக் கொடி ஏந்திய கப்பல்களைப் பாதுகாப்பாக இயக்கி, நாட்டில் எந்தவொரு எரிசக்தி தட்டுப்பாடும் ஏற்படாமல் பார்த்துக் கொண்டது. இந்த விநியோகத் தடையைச் சமாளிக்க உள்நாட்டு எல்.பி.ஜி உற்பத்தியானது 32 டி.எம்.டி-யிலிருந்து 52 டி.எம்.டி ஆக, அதாவது 60 விழுக்காட்டிற்கும் மேல் அதிகரிக்கப்பட்டதுடன், அமெரிக்கா, கனடா, அல்ஜீரியா போன்ற இதர நாடுகளிலிருந்தும் எரிவாயு இறக்குமதி பரவலாக்கப்பட்டது.
மேலும், மானிய விலை சிலிண்டர்கள் வணிக ரீதியாக முறைகேடாகப் பயன்படுத்தப்படுவதைத் தடுக்க, ஓ.டி.பி (OTP) அடிப்படையிலான விநியோக முறை 90 விழுக்காடு வரை உயர்த்தப்பட்டு கண்காணிப்பு பலப்படுத்தப்பட்டுள்ளது. சர்வதேச சந்தையில் கடுமையான விலை ஏற்ற இறக்கங்கள் இருந்தபோதிலும், இந்திய மக்களுக்குத் தடையற்ற மற்றும் மலிவான சமையல் எரிவாயு கிடைப்பதை அரசு உறுதி செய்துள்ள அதே வேளையில், இந்த விலைமதிப்பற்ற வளத்தை நுகர்வோர் சிக்கனமாகவும், பாதுகாப்பாகவும் பயன்படுத்துமாறு மத்திய அரசு அறிவுறுத்தியுள்ளது.
