உயிர்த்த ஞாயிறு குண்டுவெடிப்பு வழக்கில் இரண்டாவது சூத்திரதாரியான ‘கபூர் மாமா’, பல்கலைக்கழக மாணவர்களுக்கு வழங்கப்படும் வாடகை வீடு ஒன்றில் பதுங்கியிருந்தார் என நிந்தாவூர் பகுதியைச் சேர்ந்த சாட்சியாளர் ஒருவர் நீதிமன்றிற்கு அறிவித்துள்ளார்.
கொழும்பு உயர் நீதிமன்றத்தில் மூவரட அடங்கிய நீதியரசர் குழு முன்னிலையில் அவர் இதனை வெளிப்படுத்தியுள்ளார்.
உயர் நீதிமன்ற நீதியரசர்களான நவரத்ன மராசிங்க, சுஜீவ நிஸ்ஸங்க மற்றும் இராமநாதன் கண்ணன் ஆகியோர் அடங்கிய அமர்வின் முன் இவ்வழக்கு விசாரணைக்கு எடுத்துக்கொள்ளப்பட்டபோது ‘கபூர் மாமா’, குறித்து அடையாளம் காணப்பட்டுள்ளது.
தாக்குதலுக்குப் பிறகு நின்தாவூரில் உள்ள பாதுகாப்பான வீட்டில் ஒளிந்திருந்த நபரை அடையாளம் காட்டுமாறு நீதிமன்றம் குற்றம் சாட்டப்பட்டவரிடம் கேட்டபோது, குற்றம் சாட்டப்பட்டவரை அணுக தனக்குப் பயமாக இருப்பதாக சாட்சி கூறியுள்ளார்.
இருப்பினும், குற்றம் சாட்டப்பட்டவர்கள் கடுமையான பாதுகாப்பில் இருப்பதாகவும், சாட்சிக்கும் அவரது குடும்பத்தினருக்கும் சாட்சிப் பாதுகாப்புச் சட்டத்தின் கீழ் அரசாங்கப் பாதுகாப்புக்கு உரிமை உண்டு என்றும், எனவே அவர் அச்சமின்றி தகவல் அளிக்கலாம் என்றும் நீதிமன்றம் அவருக்குத் தெரிவித்துள்ளது.
பின்னர், சாட்சி எந்தத் தயக்கமும் இன்றி, சாட்சிக் கூண்டிலிருந்து குற்றம் சாட்டப்பட்டவரை நோக்கித் தன் கையை நீட்டி, நீண்ட வெள்ளைத் தாடியும் வழுக்கைத் தலையும் கொண்ட அந்த வயதான மனிதர்தான் தனது வீட்டில் தங்கியிருந்தவர் என்று சுட்டிக்காட்டியுள்ளார்.
சம்பவத்தை மேலும் விவரித்த சாட்சி,
தான் கொழும்பில் உள்ள ஒரு அரசாங்க நிறுவனத்தில் ஊழியராகப் பணிபுரிவதாகவும், உயிர்த்த ஞாயிறு தாக்குதல்களுக்கு இரண்டு நாட்களுக்கு முன்பு, ஒரு வெள்ளிக்கிழமையன்று வார இறுதி விடுமுறைக்காக அந்தக் கிராமத்திற்குச் சென்றிருந்ததாகவும் கூறினார்.
அவர் தனது சகோதரியின் வீட்டில் தனது தாயைச் சந்தித்ததாகவும், வயதான தாயால் வீட்டில் தனியாக இருக்க முடியாததால், அவர் தனது இளைய மகளின் வீட்டிற்கு வந்திருந்ததாகவும் கூறினார்.
ஒரு மாமாவால் தனக்கு அறிமுகப்படுத்தப்பட்ட பல்கலைக்கழக மாணவர் குழுவிற்கு அந்த வீட்டை வாடகைக்கு விட்டிருப்பதாகத் தாய் தன்னிடம் கூறியதாக சாட்சி தெரிவித்தார்.
வீட்டை வாடகைக்கு எடுத்தவர்களின் அடையாள விவரங்களை காவல்துறையிடம் கொடுத்தீர்களா என்று தாயிடம் கேட்டபோது, அவ்வாறு செய்யவில்லை என்று அவர் கூறினார்.
மேலும், அவர்களைச் சந்திப்பதற்காக மறுநாள் வீட்டிற்கு சென்றதாகவும், ஆனால் வீடு பூட்டப்பட்டிருந்ததால் திரும்பி வர வேண்டியிருந்ததாகவும் அவர் வெளிப்படுத்தினார்.
பின்னர், 2019 ஏப்ரல் 21 அன்று, நாடு முழுவதும் பல இடங்களில் தாக்குதல்கள் நிகழ்ந்தன. அன்று மாலை தான் மீண்டும் வீட்டிற்கு சென்றதாக அந்த சாட்சி கூறியுள்ளார்.
அவர் கதவைத் தட்டியபோது, ஒரு இளைஞன் வெளியே வந்துள்ளார். அவன் தன்னை அறிமுகப்படுத்திக்கொண்டு, தான் வந்ததற்கான காரணத்தை விளக்கியபோது, வீட்டிற்குள் மற்றொரு முதியவர் இருந்ததை அந்த சாட்சி கண்டதாகக் கூறினார்.
பின்னர் அவர்களின் அடையாள அட்டைகளை வழங்குவதாக அந்த இளைஞன் உறுதியளித்ததும் தெரியவந்தது. இருப்பினும், தாக்குதல் காரணமாக விதிக்கப்பட்ட ஊரடங்கு உத்தரவால் தன்னால் வேலைக்குச் செல்ல முடியவில்லை என்றும், அடையாள அட்டைகளைக் கோருவதற்காக திங்கட்கிழமை மீண்டும் வீட்டிற்கு சென்றபோது, வீட்டிற்குள் இருந்தவர்கள் வீட்டை விட்டு வெளியேறிவிட்டதாக அக்கம்பக்கத்தினர் தன்னிடம் தெரிவித்ததாகவும் அந்த சாட்சி கூறியுள்ளார்.
இந்நிலையில் விசாரணையின் போது அரசுத் தரப்பை வழிநடத்திய அரசு சட்டத்தரணி சச்சிட்டா பண்டாரா, வீட்டில் இருந்த அந்த முதியவரை மீண்டும் பார்த்தால் அடையாளம் காட்ட முடியுமா என்று கேட்டபோது, சாட்சியாளர் அவரது முகம் தனக்கு நன்றாக நினைவிருக்கிறது என்று கூறினார்.
நீதிமன்ற அறையில் இருந்த பிரதிவாதிகளைப் பார்த்து அடையாளம் காட்டுமாறு அரசுத் தரப்பு கோரியது. தலைமை நீதியரசர் தேவைப்பட்டால் பிரதிவாதிகளுக்கு அருகில் செல்ல அனுமதித்தபோதிலும், சாட்சியாளரின் பயத்தின் காரணமாக, சாட்சிக் கூண்டிலிருந்தே அவர்களை அடையாளம் காட்டுமாறு அவருக்கு உத்தரவிடப்பட்டது.
அதன்படி, நீதிமன்ற அறையில் பல வரிசைகளில் அமர்ந்திருந்த 26 பிரதிவாதிகளும் ஒவ்வொருவராக எழுந்து நிற்க உத்தரவிடப்பட்டனர்.
அப்போது, உயிர்த்த ஞாயிறு தாக்குதலுக்குப் பிறகு நிந்தாவூர் வீட்டில் ஒளிந்திருந்த நபர், இரண்டாவது பிரதிவாதியான முகமது சைது ஆடம் லெப்பே என்ற ‘கபூர் மாமா’ என்பதை சாட்சியாளர் சரியாக அடையாளம் காட்டினார்.
இரண்டாவதுசூத்திரதாரிக்காக முன்னிலையான சட்டத்தரணி கண்ணல் மத்துமகே, சாட்சியிடம் குறுக்கு விசாரணை செய்தார்.
அதற்குப் பதிலளித்த சாட்சி, முந்தைய நாள் சாட்சியமளிக்கத் தான் அழைக்கப்பட்டிருந்ததாகக் கூறினார்.
நீண்ட பயணத்தின் காரணமாகத் தான் உடல்ரீதியாகச் சோர்வடைந்திருந்தபோதிலும், அது தனது நினைவாற்றலை எந்த வகையிலும் பாதிக்கவில்லை என்றும், எதிர் தரப்பு சட்டத்தரணி தனது வீட்டிற்கு வந்த திகதிகளைக் குழப்ப முயற்சிக்கிறார் என்றும் சாட்சி வலியுறுத்தினார்.
இந்தச் சாட்சியங்களின் விசாரணையைத் தொடர்ந்து, சாட்சியின் தாய், சகோதரி மற்றும் மாமா ஆகியோரும் நீதிமன்றத்தில் சாட்சியமளித்தனர்.
இந்த தினசரி விசாரணையில், சட்டமா அதிபரைப் பிரதிநிதித்துவப்படுத்தும் மேலதிக சொலிசிட்டர் ஜெனரல் ஹரிப்ரியா ஜெயசுந்தர, மேலதிக சொலிசிட்டர் ஜெனரல் சுதர்ஷனா டி சில்வா, சட்டத்தரணிகளான சக்திகா ஜகோதாரச்சி மற்றும் அக்கில தல்படடு ஆகியோர் அடங்கிய சட்டத்தரணிகள் குழு வழக்கை முன்னெடுத்துச் செல்கிறது.
மேலும் சட்டத்தரணிகளான கனில் பெர்னாண்டோ உள்ளிட்ட ஒரு சட்டத்தரணிகள் குழு பிரதிவாதி தரப்பிற்காக முன்னிலையாகி , அதேசமயம் பெரும்பாலான பிரதிவாதிகள் எந்தவொரு சட்ட உதவியும் இன்றித் தாங்களாகவே வாதாடுகின்றமை குறிப்பிடத்தக்கது.
