இந்திய அணியை மிரட்டிய ஜப்பான்.. 2 ரன்கள் வித்தியாசத்தில் தப்பியது உலக சாம்பியன் டீம்.. | IPL News (ஐபிஎல் செய்திகள்)

‘டுஜுவான்’ (Typhoon Dujuan) புயல் காரணமாகப் பெய்த கனமழை மற்றும் ஈரப்பதம் நிறைந்த மைதானம் காரணமாகப் போட்டி தாமதமானது. இதனால் ஆட்டம் தலா 5 ஓவர்கள் கொண்ட போட்டியாகக் குறைக்கப்பட்டது. டாஸ் வென்ற இந்திய அணியின் கேப்டன் ஸ்ரேயாஸ் ஐயர் பேட்டிங்கைத் தேர்வு செய்தார்.

மழைக்கால ஆடுகளத்தில் ஜப்பான் பந்துவீச்சாளர்கள், குறிப்பாகச் சுழற்பந்து வீச்சாளர்கள் துல்லியமாகப் பந்துவீசி இந்திய நட்சத்திர பேட்டர்களுக்குப் பெரும் சவாலாக அமைந்தனர். தொடக்க ஆட்டக்காரர் அபிஷேக் சர்மா, 17 வயதான ஜப்பான் சுழற்பந்து வீச்சாளர் சார்லி ஹரா-ஹின்ஸே (Charlie Hara-Hinze) வீசிய முதல் பந்திலேயே ஆட்டமிழந்து அதிர்ச்சியளித்தார்.

சஞ்சு சாம்சன் 9 ரன்  மற்றும் இஷான் கிஷன் ரன் என சொற்ப ரன்களில் ஆட்டமிழந்து வெளியேறினர். கேப்டன் ஸ்ரேயாஸ் ஐயர் மட்டும் ஓரளவு நிலைத்து நின்று 12 பந்துகளில் 16 ரன்கள் சேர்த்தார். ஜப்பான் அணியின் சார்லி ஹரா-ஹின்ஸே 2 ஓவர்களில் 17 ரன்கள் விட்டுக்கொடுத்து 2 விக்கெட்டுகளைக் கைப்பற்றி அசத்தினார். இறுதியில் இந்திய அணி 5 ஓவர்கள் முடிவில் 4 விக்கெட் இழப்பிற்கு 32 ரன்கள் மட்டுமே எடுக்க முடிந்தது.

33 ரன்கள் எடுத்தால் வெற்றி என்ற இலக்குடன் களம் இறங்கிய ஐசிசியின் 41-வது இடத்தில் உள்ள ஜப்பான் அணி, உலக சாம்பியனான இந்தியாவை இறுதிவரை பதற்றத்தில் வைத்திருந்தது. ஜப்பான் அணியின் கேப்டன் கெண்டல் கடோவாக்கி-ஃப்ளெமிங் 12 ரன்கள் எடுத்து அணியை வெற்றிப் பாதைக்கு அழைத்துச் செல்ல முயன்றார்.

கடைசி ஓவரில் வெற்றிக்கு 4 ரன்கள் தேவைப்பட்ட நிலையில், அக்சர் படேல் துல்லியமாகப் பந்துவீசி ரன்களைக் கட்டுப்படுத்தினார். இதனால் ஜப்பான் அணி 5 ஓவர்களில் 3 விக்கெட் இழப்பிற்கு 30 ரன்கள் மட்டுமே எடுத்து, வெறும் 2 ரன்கள் வித்தியாசத்தில் தோல்வியைத் தழுவியது. இந்திய தரப்பில் வாஷிங்டன் சுந்தர் 2 விக்கெட்டுகளை வீழ்த்தினார்.