‘இந்தியாவின் பன்முகத்தன்மைக்கு மாம்பழங்களே சாட்சி..’ – மன் கி பாத் நிகழ்ச்சியில் விவசாயிகளையும் பாராட்டிய மோடி  | India News (இந்தியா செய்திகள்)

இந்தியாவின் வெவ்வேறு பகுதிகளில் விளையும் மாம்பழங்களின் தனித்துவமான சுவை, நிறம் மற்றும் நறுமணம் குறித்துப் பேசிய பிரதமர் மோடி, நாட்டின் பன்முகத்தன்மையை மாம்பழங்களின் வகைகள் மூலம் பட்டியலிட்டார்.

குறிப்பாக, மகாராஷ்டிரா மற்றும் கொங்கன் பகுதியின் ஹாபுஸ் (அல்போன்சா), குஜராத்தின் கேசர், உத்தரப் பிரதேசத்தின் தஸேரி மற்றும் பழுத்த பிறகும் பச்சை நிறமாகவே இருக்கும் வாரணாசியின் லங்டா மாம்பழம் ஆகியவற்றை அவர் குறிப்பிட்டார். மேலும், தூரத்திலிருந்தே நறுமணத்தை உணரக்கூடிய பீகாரின் ஜர்தாலு மாம்பழம், சௌசா மற்றும் மால்தா ரகங்களையும் அவர் நினைவு கூர்ந்தார்.

தென்னிந்தியாவின் அடையாளங்களாக விளங்கும் பங்காநபள்ளி, தோதாபுரி, நீலம் மற்றும் மல்கோவா மாம்பழங்களையும், மேற்கு வங்கத்தின் ஹிம்சாகர் மற்றும் ஒடிசா, ஆந்திராவில் விளையும் சுவர்ணரேகா மாம்பழங்களையும் இந்தியாவின் விவசாய மற்றும் கலாச்சார பன்முகத்தன்மையின் அடையாளங்களாக பிரதமர் மோடி சுட்டிக்காட்டினார்.

இந்திய மாம்பழங்கள் தற்போது உள்ளூர் சந்தைகளுடன் நின்றுவிடாமல், உலகளாவிய சர்வதேச சந்தைகளிலும் தங்களின் வலுவான முத்திரையைப் பதித்து வருவதாக அவர் மகிழ்ச்சி தெரிவித்தார்.

மாம்பழ உற்பத்தியில் ஈடுபடும் விவசாயிகள் வெறும் விவசாய உற்பத்தியாளர்கள் மட்டுமல்ல என்றும், நாட்டின் பொருளாதாரத்தை வலுப்படுத்தி, சர்வதேச அளவில் இந்தியாவின் பெருமையை உயர்த்தும் மிக முக்கிய தூண்களாகத் திகழ்கிறார்கள் என்றும் கூறி, அவர்களுக்குத் தனது மனமார்ந்த வாழ்த்துகளையும் பாராட்டுகளையும் பிரதமர் மோடி தெரிவித்துக் கொண்டார்.