ஆதார் அட்டை என்பது வெறும் அடையாள அட்டை மட்டுமல்ல; இது இன்றைய காலகட்டத்தில் மிக முக்கியமான ஆவணங்களில் ஒன்றாகும். வேலைவாய்ப்பு, வங்கிச் சேவைகள், அரசுத் திட்டங்களின் பலன்கள், பள்ளிகள் மற்றும் கல்லூரிகள் எனப் பல்வேறு துறைகளில் ஆதார் அட்டை அவசியமாகிறது. ஆதார் அட்டையில் ஏதேனும் பிழை இருந்தால், அது பல்வேறு பணிகளைப் பாதிக்கலாம் அல்லது முடக்கலாம். இருப்பினும், ஆதார் அட்டையில் உள்ள விவரங்களைச் சரிசெய்வதற்கான வாய்ப்பு உள்ளது. ஆதார் விவரங்களை மாற்றும் நடைமுறையை UIDAI படிப்படியாக எளிதாக்கி வருகிறது. சில விவரங்களை வீட்டிலிருந்தபடியே இணையம் வழியாகப் புதுப்பிக்க முடியும்; அதே சமயம், சில மாற்றங்களுக்கு ஆதார் சேவை மையங்களுக்கு நேரில் செல்ல வேண்டியிருக்கும். எனினும், ஆதார் விவரங்களைச் சரிசெய்வதில் சில வரம்புகள் உள்ளன. ஆதார் அட்டையில் பெயர் மற்றும் முகவரியை மாற்றுவது குறித்துப் பலருக்கும் கேள்விகள் உள்ளன. உதாரணமாக, ஆதார் அட்டையில் ஒருவரது பெயரை எத்தனை முறை திருத்த முடியும்?, முகவரியை எத்தனை முறை மாற்ற முடியும்? என்று தான். இதுதொடர்பான முழு விவரங்களை தற்போது பார்ப்போம்.
