ஆடி கடைசி செவ்வாய்… தோவாளை மலர் சந்தையில் விறுவிறுவென விலையேறிய பூக்கள்… | வணிகம்

தோவாளை மலர்ச் சந்தையில் நேற்று மல்லிகை ரூ.350க்கும், பிச்சி ரூ.400க்கும், சம்பங்கி ரூ.100க்கும் விற்பனை செய்யப்பட்ட நிலையில் ஆடி மாத கடைசி செவ்வாய்க்கிழமையை முன்னிட்டு பூக்கள் விலை கணிசமாக உயர்ந்துள்ளது.

அதன்படி, பிச்சிப்பூ கிலோ ரூ.600க்கும், மல்லிகைப்பூ கிலோ ரூ.700க்கும், அரளிப்பூ கிலோ ரூ.100க்கும், வாடாமல்லி கிலோ ரூ.80க்கும், கேந்தி பூக்கள் கிலோ ரூ.100க்கும், சம்பங்கி கிலோ ரூ.300க்கும், முல்லைப் பூ கிலோ ரூ.700க்கும், ரோஸ் கிலோ ரூ.180க்கும் விற்பனையாகிறது.

மேலும், ஸ்டெம்ப்ரோஸ் ஒரு கட்டு ரூ.300க்கும், துளசி கிலோ ரூ.50க்கும், தாமரைப் பூ ஒன்று ரூ.10க்கும், மரிக்கொழுந்து கிலோ ரூ.150க்கும், செவ்வந்தி கிலோ ரூ.250க்கும் விற்கப்படுகிறது.

இதுகுறித்து தோவாளை மலர் சந்தையை சேர்ந்த வியாபாரி பெருமாள் கூறுகையில், “ஆவணி மாதத்தில் கிருஷ்ண ஜெயந்தி, விநாயகர் சதுர்த்தி, ஓணம் பண்டிகை போன்று ஏகப்பட்ட பண்டிகை தினங்கள், சுபமுகூர்த்த தினங்கள் வருவதால் இன்று முதல் பூக்களின் விலை பல மடங்கு உயர வாய்ப்புள்ளது.

மேலும் பூக்களின் தேவைக்கேற்ப பூக்களின் வரத்து வெளி மாவட்டங்களில் இருந்து தோவாளை மலர் சந்தைக்கு குறைவாக வருவதால் அதன் காரணமாகவும் பூக்களின் விலை அதிகரிக்கும். கடந்த வார ஒப்பீடுகளில் இந்த வாரத்தில் பூக்களின் விலை சற்று அதிகமாக உள்ளது. வரும் வாரங்களில் இதைவிட அதிகரிக்க வாய்ப்பு உள்ளது” என தெரிவித்தார்.