Last Updated:
இந்தத் தொடரில் மல்யுத்தப் பிரிவில் இந்தியா கைப்பற்றும் 5-வது ஒட்டுமொத்தப் பதக்கமாக தீபக் புனியாவின் இந்த வெண்கலப் பதக்கம் அமைந்துள்ளது
ஜப்பானின் ஐச்சி-நகோயாவில் நடைபெற்று வரும் 2026 ஆசிய விளையாட்டுப் போட்டியில், இந்தியாவின் நட்சத்திர மல்யுத்த வீரர் தீபக் புனியா 97 கிலோ ஃபிரீஸ்டைல் பிரிவில் வெண்கலப் பதக்கம் வென்று நாட்டிற்கு பெருமை சேர்த்துள்ளார்.
2026 ஆசிய விளையாட்டுப் போட்டியின் ஆடவர் ஃபிரீஸ்டைல் 97 கிலோ எடைப்பிரிவு வெண்கலப் பதக்கத்திற்கான போட்டியில் தீபக் புனியா, மங்கோலியாவின் கன்பாட்டர் கன்குயாக்கை எதிர்கொண்டார். மிகவும் விறுவிறுப்பாகவும், குறைந்த புள்ளிகள் கணக்கிலும் நடைபெற்ற இந்தப் போட்டியில், தொடக்கத்திலேயே 2 புள்ளிகளைச் சாதுரியமாகப் பெற்ற 27 வயதான தீபக் புனியா, இறுதிவரை அந்த முன்னிலையைத் தக்கவைத்து வெற்றி பெற்று வெண்கலப் பதக்கத்தைக் கைப்பற்றினார்.
முன்னதாக நடைபெற்ற அரைஇறுதிப் போட்டியில் உஸ்பெக்கிஸ்தானின் ஷெர்சோத் பொயோனோவுக்கு எதிராகத் தீபக் புனியா தீவிரமாகப் போராடினார். போட்டியின் இறுதி விநாடி வரை தங்கம் வெல்லும் வாய்ப்பிற்காகப் போராடியபோதிலும், 8-9 என்ற புள்ளி கணக்கில் நூலிழையில் தோல்வியடைந்து தங்கப் பதக்கப் போட்டிக்குத் தகுதிபெறும் வாய்ப்பை இழந்தார்.
இதற்கு முன்னதாக, 16-வது சுற்றுப் போட்டியில் சீனாவின் சோவ் ஜுன்பெங்கை 12-2 என்ற கணக்கில் வீழ்த்தி தீபக் புனியா அபார வெற்றி பெற்றார். தொடர்ந்து நடைபெற்ற கால்இறுதிப் போட்டியில் ஹாங்காங் வீரர் லி வுய் ஃபங் வின்சென்ட் போட்டியில் இருந்து விலகியதால் தீபக் புனியா எளிதாக அரைஇறுதிக்கு முன்னேறினார்.
ஆசிய விளையாட்டுப் போட்டிகளில் தீபக் புனியா வெல்லும் இரண்டாவது பதக்கம் இதுவாகும். இதற்கு முன் 2023-ல் நடைபெற்ற ஹாங்க்சோ ஆசிய விளையாட்டுப் போட்டியில், ஆடவர் 86 கிலோ ஃபிரீஸ்டைல் பிரிவில் இவர் வெள்ளிப் பதக்கம் வென்றிருந்தார் என்பது குறிப்பிடத்தக்கது.
நடப்பு ஆசிய விளையாட்டுப் போட்டியில் சுஜீத் கல்கல் மற்றும் அமான் ஷெராவத் ஆகியோர் தங்கம் வென்றதைத் தொடர்ந்து, ஃபிரீஸ்டைல் மல்யுத்தத்தில் இந்தியா பெறும் 3-வது பதக்கம் இதுவாகும். மேலும், இந்தத் தொடரில் மல்யுத்தப் பிரிவில் இந்தியா கைப்பற்றும் 5-வது ஒட்டுமொத்தப் பதக்கமாக தீபக் புனியாவின் இந்த வெண்கலப் பதக்கம் அமைந்துள்ளது
