அமெரிக்காவுடன் இராஜதந்திரப் பேச்சுவார்த்தை நடத்துவதற்கும், இராணுவ மோதலை எதிர்கொள்வதற்கும் ஈரான் முன்னெப்போதையும் விட அதிகளவில் தயாராக இருப்பதாக ஈரான் வெளியுறவு அமைச்சர் அப்பாஸ் அராக்சி தெரிவித்துள்ளார்.
அடுத்தகட்ட நடவடிக்கை, பேச்சுவார்த்தையை முன்னெடுப்பதற்கு அமெரிக்கா காட்டும் விருப்பத்திலேயே தங்கியுள்ளதாகவும் அவர் குறிப்பிட்டுள்ளார்.
துர்க்மெனிஸ்தானுக்கான தனது விஜயத்தை நிறைவு செய்த பின்னர், அவர் இதனைத் தெரிவித்துள்ளார்.
இராஜதந்திர ரீதியிலான தீர்வு
இராஜதந்திர ரீதியிலான தீர்வை எட்டுவதற்கான தமது குறிப்பிட்ட நிபந்தனைகளையும், தயாரிக்கப்பட்ட திட்டத்தையும் ஈரான் ஏற்கனவே முன்வைத்துள்ளதாக அவர் குறிப்பிட்டுள்ளார்.
இந்தப் பேச்சுவார்த்தைகளை முன்னெடுப்பதில் கட்டார் மற்றும் பாகிஸ்தான் ஆகிய நாடுகள் தொலைபேசி உரையாடல்கள் மற்றும் நேரடி இராஜதந்திரப் பயணங்கள் ஊடாகத் தீவிர பங்களிப்பை வழங்கி வருவதாகவும் தெரிவித்துள்ளார்.
இதன்போது மேலும் கருத்துத் தெரிவித்த அவர்,
“எமது குறிப்பிட்ட நிபந்தனைகளை அறிவித்துள்ளதுடன், தயாரிக்கப்பட்ட திட்டத்தையும் முன்வைத்துள்ளோம்.
தற்போது அமெரிக்கத் தரப்பில் எவ்வளவு அரசியல் விவேகம் காணப்படுகிறது என்பதிலும், இராஜதந்திரப் பாதையைத் தேர்ந்தெடுக்கும் விருப்பம் உள்ளதா என்பதிலுமே அனைத்தும் தங்கியுள்ளன.
அல்லது கடந்த காலங்களைப் போலவே, நிலைமையை மீண்டும் ஆக்கிரமிப்பு மற்றும் இராணுவ நடவடிக்கைகளை நோக்கித் தள்ளப்போகிறார்களா என்பதே கேள்வி” எனத் தெரிவித்துள்ளார்.
| செய்திகளை உடனுக்குடன் தெரிந்து கொள்ள IBC தமிழ் WHATSAPP CHANNEL இல் இணைந்து கொள்ளுங்கள்…! |
