சுமார் 3 லட்சம் வாகன இலக்கத் தகடுகள் அச்சிடப்பட வேண்டியுள்ளதாகவும், குவிந்துள்ள இலக்கத் தகடுகளை அச்சிடுவதற்கான புதிய முன்மொழிவு சமர்ப்பிக்கப்பட்டுள்ளதாகவும் மோட்டார் போக்குவரத்து ஆணையாளர் நாயகம், ஓய்வுபெற்ற ஏர் வைஸ் மார்ஷல் துஷாரா இடுனில் பெர்னாண்டோ இன்று (9) தெரிவித்தார்.
நாரஹேன்பிட்டாவில் உள்ள மோட்டார் போக்குவரத்து ஆணையர் திணைக்களத்தின் தலைமை அலுவலகத்தில் இன்று (9) நடைபெற்ற சிறப்பு ஊடக சந்திப்பில் மோட்டார் போக்குவரத்து ஆணையர் நாயகம் இதைத் தெரிவித்தார்.
ஆறு மாதங்களுக்குள் அனைவருக்கும் இலக்கத் தகடுகள்
மேலும், இந்த முன்மொழிவுக்கு ஒப்புதல் அளிக்கப்பட்டவுடன், இந்த அமைப்பு இரண்டு ஷிப்டுகளாகப் பணியாற்றி, சுமார் ஆறு மாதங்களுக்குள் அனைவருக்கும் இலக்கத் தகடுகளை வழங்கும் என்றும் அவர் கூறினார்.
இந்த ஆண்டு மார்ச் 10-ஆம் திகதிக்குப் பிறகு பதிவு செய்யப்பட்ட சுமார் 62,000 வாகனங்களின் இலக்கத் தகடுகள் அச்சிடப்பட்டுவிட்டதாகவும், அவற்றை எடுத்துக்கொள்ளுமாறு பொதுமக்களுக்குத் தெரிவிக்கப்பட்டுள்ளதாகவும் அவர் தெரிவித்தார்.
திணைக்களத்திடம் உள்ள 32,000 வாகன இலக்கத் தகடுகள்
மேலும், 2023 மற்றும் 2024 ஆம் ஆண்டுகளுக்கான சுமார் 32,000 வாகன இலக்கத் தகடுகள் திணைக்களத்திடம் உள்ளன. அதுமட்டுமின்றி, 2025 ஆம் ஆண்டிற்கான வாகன இலக்கத் தகடுகள் அச்சிடுவதற்கு ஒரு புதிய ஒப்பந்தம் கையெழுத்திடப்படும் என்றும் அவர் கூறினார்.
அடுத்த ஆறு மாதங்களுக்குள் அனைத்து வாகன இலக்கத்தகடுகள் புதுப்பிக்கப்படும் என்றும், அதன் பிறகு பதிவு செய்யப்படும் எந்தவொரு வாகனத்திற்கும், பதிவு செய்யப்பட்ட நாளிலிருந்து சுமார் எட்டு நாட்களுக்குள் வாகன இலக்கத் தகடுகள் வழங்கப்படும் என எதிர்பார்க்கப்படுவதாகவும் அவர் மேலும் தெரிவித்தார்.
| செய்திகளை உடனுக்குடன் தெரிந்து கொள்ள IBC தமிழ் WHATSAPP CHANNEL இல் இணைந்து கொள்ளுங்கள்…! |
