வெகுவாக குறைந்த உற்பத்தி – எகிறும் இளநீர் விலை? – News18 தமிழ்

கோடை வெயிலின் தாக்கம் அதிகரிப்பால் கோவை மாவட்டம் பொள்ளாச்சியில் இளநீர் உற்பத்தி வெகுவாக குறைந்துள்ளது. இளநீர் தட்டுப்பாடு ஏற்பட்டுள்ளதால் வரும் வாரங்களில் விலை அதிகரிக்க வாய்ப்பு உள்ளதாக தென்னை விவசாயிகள் தெரிவித்துள்ளனர்.

இளநீருக்கு பெயர்போன பொள்ளாச்சியில் அறுவடை செய்யப்படும் செவ்விளநீர் மற்றும் பச்சை நிற இளநீர் தமிழ்நாட்டின் பல்வேறு மாவட்டங்கள் மற்றும் வெளி மாநிலங்களுக்கு விற்பனைக்காக அனுப்பி வைக்கப்படுகின்றன.

கோடை வெயில் கடுமையாக சுட்டெரித்து வரும்நிலையில், கடும் வெப்பத்தில் இருந்து தப்பிக்க இளநீர் உள்ளிட்டவற்றை மக்கள் நாடி செல்கின்றனர். இதனால் இளநீருக்கு மவுசு அதிகரித்துள்ளது. தேவை அதிகரிப்பால், பொள்ளாச்சியிலிருந்து இளநீர் அனுப்பிவைக்கும் பணி நாளுக்கு நாள் அதிகரித்து வந்தது.

நாளொன்றுக்கு சுமார் 3 லட்சம் இளநீர் அனுப்பிவைக்கப்பட்டு வந்தது. தொடர்ந்து தேவை அதிகரித்து வருவதால், நேரடி விலையாக ஒரு இளநீர் 33 ரூபாய் வரை உயர்ந்து விற்பனை செய்யப்பட்டது.

ஆனால், தற்போது போதிய மழையின்றி வெயிலின் தாக்கம் அதிகரிப்பால் பல இடங்களில் தென்னைகள் வாடி வதங்கியதுடன், இளநீர் உற்பத்தி குறைந்துள்ளது. இதனால் பொள்ளாச்சி சுற்றுவட்டார பகுதிகளில் இளநீர் தட்டுப்பாடு ஏற்பட்டுள்ளது.

காலை உணவுக்கு ஏற்ற சிறந்த 7 தென்னிந்திய உணவுகள்.!
மேலும் செய்திகள்…