Yagi Cyclone | வெள்ளம், நிலச்சரிவு, மரணம்… வியட்நாமை புரட்டிப்போட்ட ‘யாகி’ புயல்! – News18 தமிழ்

வியட்நாமின் வடக்கு பகுதியில் பல பிரபலமான மற்றும் உலக அளவில் ஏற்றுமதியில் முக்கிய நிறுவனங்கள் அமைந்துள்ளன. குறிப்பாக, பாக் ஜியாங் மற்றும் தாய் நுயென் ஆகிய பகுதிகளில் அமைந்துள்ள சாம்சங் எலக்ட்ரானிக்ஸ் மற்றும் ஃபாக்ஸ்கான் ஆகிய தொழிற்சாலைகள் வெள்ளத்தில் பெரும் சேதத்தை சந்தித்துள்ளதாக அங்குள்ள செய்தி நிறுவனங்கள் தகவல் தெரிவிக்கின்றன.

வடக்கு வியட்நாமில் உள்ள பல ஆறுகளிலும் நீரின் அளவு அபாயக் கட்டத்தை தாண்டி உயர்ந்துவருவதாகவும், பல கிராமங்கள் வெள்ளத்தில் மூழ்கியுள்ளதாகவும் தவல்கள் வெளியாகியுள்ளன. வடக்கு மாகாணத்தில் உள்ள பூதோ எனும் பகுதியில் ஓடும் சிவப்பு நதியின் மீது அமைந்திருக்கும் 30 வருடம் பழைமையான பாலம் இந்த இயற்கை சீற்றத்தால் இரண்டாக உடைந்தது. இந்த உடைப்பின் போது கார், லாரி, இருச்சக்கர வாகனங்கள் அந்தப் பாலத்தின் மீது சென்றுக்கொண்டிருந்தன. இதில் சில வாகனங்கள் பாலம் உடைந்தபோது ஆற்றில் அடித்து செல்லப்பட்டுள்ளன. இந்த விபத்தில் சிக்கியவர்களில் மூன்று பேர் மீட்கப்பட்டுள்ளதாகவும் 13 பேரை தேடும் பணி தீவிரப்படுத்தப்பட்டுள்ளதாகவும் சொல்லப்பட்டுள்ளது.

இந்தப்பால விபத்தைத் தொடர்ந்து, ஹனோய்யில் உள்ள மிகப்பெரிய பாலமான சுவாங் டுவாங் பாலத்தில் போக்குவரத்து உடனடியாக நிறுத்தப்பட்டுள்ளது. அதுமட்டுமின்றி பல பாலங்களிலும் போக்குவரத்து நிறுத்தப்பட்டுள்ளதாக அந்த நாட்டின் செய்தி நிறுவனங்கள் தெரிவித்துள்ளன. மேலும், வெள்ளம் பாதிப்பு ஏற்பட வாய்ப்புள்ள பகுதிகளில் இருக்கும் மக்களை மீட்கும் நடவடிக்கையிலும் அந்த நாட்டு அரசு இறங்கியுள்ளது.

இதுவரை யாகி புயலினால் வியட்நாமில், 300 பில்லியன் அளவுக்கு சேதாரம் அடைந்துள்ளதாக சொல்லப்படுகிறது. இதுபோக வடக்கு வியட்நாமில், 1,48,600 ஹெட்கர் விளைநிலங்களும், 50,000 வீடுகளும் வெள்ளத்தில் மூழ்கியுள்ளதாகவும் தகவல்கள் வெளியாகியுள்ளன.

.