World Press Photo | குழந்தையின் இறந்த உடலை கையில் ஏந்திய பெண் புகைப்படம்… வார்ல்ட் ப்ரஸ் ஃபோட்டோ விருது ! – News18 தமிழ்

2024-ம் ஆண்டிற்கான World Press Photo விருதை ராய்ட்டர்ஸ் செய்தி நிறுவனத்தில் பணியாற்றி வரும் முகமது சலேம் வென்றுள்ளார். இஸ்ரேல்-ஹமாஸ் இடையிலான போரில் உயிரிழந்த தனது 5 வயது குழந்தையின் இறந்த உடலை கையில் ஏந்தி வருத்தத்துடன் பெண்ணின் புகைப்படத்திற்கு இந்த விருது வழங்கப்பட்டுள்ளது.

கடந்த ஆண்டு அக்டோபர் மாதம் தெற்கு காசாவின் கான் யூனிஸ் பகுதியில் அமைந்துள்ள நாசர் மருத்துவமனையின் வாயிலில் இந்த புகைப்படம் எடுக்கப்பட்டுள்ளது. பாலஸ்தீனத்தின் காசா பகுதியில் இஸ்ரேல் குண்டு மழை பொழிந்தபோது பலர் உயிரிழந்தனர். அப்போது இறந்த தங்கள் உறவினர்களின் உடலை மக்கள் தேடி அலைந்த துயரமான நேரம் அது.

மருத்துவமனையின் பிணவறையில் துணியால் சுற்றப்பட்டு கிடந்த தனது 5 வயது மகளின் உயிரிழந்த உடலை பார்த்து பெண் ஒருவர் அழுவதை தனது கேமரா மூலம் படம் பிடித்தார் முகமது சலேம். ஆம்ஸ்டர்டாமை தலைமையிடமாகக் கொண்ட வேர்ல்ட் பிரஸ் போட்டோ ஃபவுண்டேஷன் அமைப்பு ஆண்டுதோறும் சிறந்த படத்துக்கான விருதை வழங்கி வருகிறது.

இதையும் படிக்க : 
ஊழியர்களின் இதுப்போன்ற செயல்களை ஒரு போதும் சகித்து கொள்ள முடியாது – கூகுள் நிறுவனம்

போர், மோதல் ஏற்படும் பகுதிகளில் பணியாற்றும் பத்திரிகையாளர்கள் எதிர்கொள்ளும் அச்சுறுத்தலை அங்கீகரிப்பது மிக அவசியம் என அந்த அமைப்பு தெரிவித்துள்ளது. கடந்த அக்டோபரில் இஸ்ரேல் – ஹமாஸ் இடையிலான மோதலில் சுமார் 99 பத்திரிகையாளர்கள் மற்றும் ஊடக பணியாளர்கள் தங்களது இன்னுயிரை இழந்துள்ளதாகவும் அந்த அமைப்பு தெரிவித்துள்ளது.

யார் இந்த முகமது சலேம்?

39 வயதான முகமது சலேம் பாலஸ்தீன நாட்டை சேர்ந்தவர். புகைப்பட பத்திரிகையாளரான இவர் 2003-ம் ஆண்டு முதல் ராய்ட்டர்ஸ் செய்தி நிறுவனத்தில் பணியாற்றி வருகிறார். கடந்த 2010-ம் ஆண்டிலும் வேர்ல்ட் பிரஸ் போட்டோவிற்கான விருதையும் இவர் வென்றுள்ளார் என்பது குறிப்பிடதக்கது.

இதையும் படிக்க :
நல்ல தலைவர் வேண்டுமென்றால் வாக்களிக்க வேண்டும் – யோகி பாபு

இது குறித்து பேசிய முகமது சலேம், “காசாவின் நிலை என்ன என்பதை இந்தப் படம் விளக்குவதாக உள்ளது. தங்கள் அன்பானவர்களின் நிலைமை குறித்து அறிந்து கொள்ள மக்கள் அங்குமிங்கும் ஓடிய நேரம் அது. அப்போது இந்தப் பெண், குழந்தையின் உடலுடன் கலங்கி நின்றார். அதனை கவனித்த நான் அந்த வேதனையை ஒளிப்படத்தின் வழியே உலகில் உள்ள அனைவரும் உணர வேண்டும் என எண்ணினேன்” எனக் கூறியுள்ளார்.

உலகம் முதல் உள்ளூர் வரை இன்றைய முக்கிய செய்திகள் (Top Tamil News, Breaking News), அண்மைச் செய்திகள் (Latest Tamil News), அனைத்தையும் நியூஸ்18 தமிழ் (News18Tamil.com) இணையதளத்தில் உடனுக்குடன் அறியலாம். News 18 தமிழ் : வாட்ஸ் அப் சேனலை ஃபாலோ செய்யுங்கள்.
நியூஸ்18 தமிழ்நாடு தொலைக்காட்சியை, ARASU CABLE – 46, TCCL – 57, SCV – 28, VK Digital – 30, SUN DIRECT DTH: 71, TATA PLAY: 1562, D2H: 2977, AIRTEL: 782, DISH TV:2977 ஆகிய அலைவரிசைகளில் காணலாம்…