அமெரிக்காவைச் சேர்ந்த முதலீட்டாளரும், தொழிலதிபரும், “பெர்க்ஷயர் ஹாத்வே” என்ற நிறுவனத்தின் தலைமை நிர்வாக அதிகாரியுமான வாரன் பஃபெட் தன் வருடாந்திரப் பங்குதாரர் அறிக்கையில் பல செய்திகளை வலியுறுத்தியிருக்கிறார். அவர் வெளியிட்டிருக்கும் அறிக்கையில், “ஒரு விஷயத்தில் தவறுகள் நடப்பது பிரச்னையல்ல. அதை சரிசெய்யாமல் இருப்பதுதான் தவறு. பெர்க்ஷயர் நிறுவனத்தில் என்னால் பல தவறுகள் நடந்திருக்கிறது. அதனால் பல சிக்கல்களை எதிர்க்கொண்டிருக்கிறேன். சில வணிகங்களின் எதிர்கால வாய்ப்புகளை தவறாக மதிப்பிட்டது, மூலதன ஒதுக்கீடு தவறாகிவிட்டது, மேலாளர்களை பணியமர்த்தும்போது, அவர்களின் திறன், நேர்மையை மதிப்பிடுவதில் பிழைகளை செய்தது எனத் தொடர்ந்து பலமுறை தவறுகள் நடந்திருக்கிறது.
விசுவாசமானவர்கள், நம்பிக்கையானவர்கள் என நம்பியவர்களால் ஏற்பட்ட ஏமாற்றங்கள், நிதி இழப்புக்கு அப்பால் காயப்படுத்தக்கூடியவை. அதாவது தோல்வியுற்ற திருமண வாழ்க்கையைப் போன்ற ஒரு வலி. எனவே, தவறுகளைச் செய்வதை ஒரு தடையாகக் கருதக் கூடாது. தவறுகளால் ஏற்படும் சிக்கல்களையும் தவிர்க்க முடியாது. ஆனால், எவ்வளவு சங்கடமானதாக இருந்தாலும் அவற்றுக்கு தகுந்த நடவடிக்கை தேவை. நான் பெரிய பொது நிறுவனங்களின் இயக்குநராக இருந்திருக்கிறேன். அங்கு நடக்கும் கூட்டங்கள், ஆய்வாளர்கள் சந்திப்புகளில் “தவறு’ என்ற வார்த்தை தடைசெய்யப்பட்ட வார்த்தைகளாக இருந்தன.
