“ராஜஸ்தான் ராயல்ஸ் அணியின் 15 வயது இளம் வீரரான வைபவ் சூர்யவன்ஷி, எனது புதிய ‘ஃபேவரைட்’ வீரராக மாறியுள்ளார்,” என சன்ரைசர்ஸ் ஹைதராபாத் அணியின் கேப்டன் பாட் கம்மின்ஸ் பாராட்டு தெரிவித்துள்ளார்.
நடப்பு ஐ.பி.எல். கிரிக்கெட் சீசனில், ராஜஸ்தான் ராயல்ஸ் வீரர் வைபவ் சூர்யவன்ஷி இதுவரை விளையாடிய 8 இன்னிங்ஸ்களில் 357 ரன்கள் குவித்துள்ளார். இதில் ஒரு சதம் மற்றும் இரண்டு அரை சதங்கள் அடங்கும். சர்வதேச கிரிக்கெட்டில் முத்திரை பதித்த முன்னணி பந்துவீச்சாளர்களான பும்ரா, ஹேசில்வுட் மற்றும் கம்மின்ஸ் ஆகியோரின் பந்துவீச்சைத் துவம்சம் செய்து, இந்த சீசனில் அவர் அனைவரது கவனத்தையும் ஈர்த்து வருகிறார்.
இரண்டாவது சதம்: சமீபத்தில் சன்ரைசர்ஸ் ஹைதராபாத் அணிக்கு எதிராக நடைபெற்ற ஆட்டத்தில், வைபவ் சூர்யவன்ஷி அதிரடியாக விளையாடி வெறும் 37 பந்துகளில் 103 ரன்கள் எடுத்தார். ஐ.பி.எல். தொடரில் இது அவரது இரண்டாவது சதமாகும். இந்த ஆட்டத்தில் ராஜஸ்தான் நிர்ணயித்த 229 ரன்கள் என்ற கடினமான இலக்கை, சன்ரைசர்ஸ் அணி 18.3 ஓவர்களிலேயே எட்டிப் பிடித்தது.
கம்மின்ஸின் பாராட்டு: போட்டிக்குத் பிறகு இளம் வீரர் வைபவ் சூர்யவன்ஷி குறித்து கம்மின்ஸ் கூறியதாவது:
“எனது புதிய ‘ஃபேவரைட்’ வீரராக வைபவ் சூர்யவன்ஷி உருவெடுத்துள்ளார் என நினைக்கிறேன். அவர் பந்தை அடிக்கும் விதம் பார்ப்பதற்கே மிக அற்புதமாக உள்ளது. அவருக்கு எதிராகப் பந்து வீசும்போது மிகச் சரியான திசையில் (Line and Length) வீச வேண்டும்; தவறினால் பந்து எல்லைக்கோட்டைத் தாண்டி வெகுதூரம் பறக்கிறது. அவரது ஆட்டமுறை மிகவும் ஈர்க்கக்கூடியதாக உள்ளது. மிகச் சிறிய வயதிலேயே தனது கிரிக்கெட் வாழ்க்கையைச் சிறப்பாகத் தொடங்கியுள்ளார்,” எனத் தெரிவித்தார்.
