இந்த விலைகள் ஆகஸ்ட் 12 வரை அமலில் இருக்கும்.
நிதி அமைச்சகம் இன்று மாலை வெளியிட்ட அறிவிப்பின்படி, நாளை முதல் RON97 பெட்ரோல் மற்றும் மானியமில்லா (Unsubsidised) RON95 பெட்ரோல், டீசல் ஆகியவற்றின் விலை லிட்டருக்கு 5 சென் குறைக்கப்படுகிறது.
நாளை முதல் RON97 பெட்ரோல் லிட்டருக்கு ரிம 4.35 என்ற விலையில் விற்பனை செய்யப்படும். அதேபோல், மானியமில்லா RON95 பெட்ரோல் லிட்டருக்கு ரிம 3.77 ஆக நிர்ணயிக்கப்பட்டுள்ளது.
மானியமில்லா டீசல் லிட்டருக்கு ரிம 4.57 என்ற விலையில் விற்பனை செய்யப்படும்.
BUDI95 திட்டத்தின் கீழ் வழங்கப்படும் RON95 பெட்ரோல் வழக்கம்போல் லிட்டருக்கு ரிம 1.99 என்ற விலையிலேயே தொடரும். அதேபோல், BUDI Diesel திட்டத்தின் கீழ் டீசல் லிட்டருக்கு ரிம 2.10 என்ற விலையில் தொடரும்.
SKPS (Subsidised Petrol Control System) திட்டத்தின் கீழ் வழங்கப்படும் மானிய பெட்ரோல் லிட்டருக்கு ரிம 2.05 என்ற விலையிலும், SKDS (Subsidised Diesel Control System) திட்டத்தின் கீழ் வழங்கப்படும் மானிய டீசல் லிட்டருக்கு ரிம 2.15 என்ற விலையிலும் மாற்றமின்றி தொடரும்.
கடந்த வாரத்தில் உலகளாவிய கச்சா எண்ணெய் சந்தையில் ஏற்பட்ட விலை மாற்றங்களே மானியமில்லா எரிபொருட்களின் விலை குறைப்புக்குக் காரணம் என நிதி அமைச்சகம் தெரிவித்துள்ளது.
மேலும், பொதுமக்கள் எரிபொருளை சிக்கனமாக பயன்படுத்தவும், பயணங்களை முன்கூட்டியே திட்டமிடவும், தேவையற்ற பயணங்களைத் தவிர்க்கவும் அமைச்சகம் கேட்டுக்கொண்டுள்ளது. இதன் மூலம் நாட்டின் எரிபொருள் இருப்பை பாதுகாப்பதோடு, அரசின் மானியச் செலவினத்தின் மீதான அழுத்தத்தையும் குறைக்க முடியும் என அமைச்சகம் தெரிவித்துள்ளது.
