கோலா திரெங்கானு:
கோலா திரெங்கானுவில் இன்று நடைபெற்ற ‘ரஹ்மா மடானி’ (PJRM) விற்பனைத் திட்டத்தில், ஒரு கிலோ 4 ரிங்கிட் என்ற மலிவு விலையில் விற்பனை செய்யப்பட்ட 11.5 டன் கோழி இறைச்சி, விற்பனை தொடங்கிய ஒரே மணி நேரத்தில் விற்றுத் தீர்ந்தது.
தற்போது சந்தையில் ஒரு கிலோ கோழி இறைச்சி சுமார் 8 ரிங்கிட் வரை விற்பனை செய்யப்படுகிறது. ஆனால், இந்தத் திட்டத்தின் கீழ் பாதி விலைக்கு (RM4) கோழி இறைச்சி வழங்கப்பட்டதால் பொதுமக்கள் கூட்டம் அலைமோதியது.
மேலும், இந்தப் பொது விற்பனையில் அரிசி வகைகளும் மிக விரைவாக விற்றுத் தீர்ந்தன: 23 டன் அரிசி (10 கிலோ மூட்டை RM24.90) மற்றும் 12.5 டன் அரிசி (5 கிலோ மூட்டை RM12.50) ஆகியவற்றை மக்கள் வெறும் 3 மணி நேரத்திற்குள் வாங்கித் தீர்த்தனர்.
இந்த ஒரு நாள் மெகா மலிவு விற்பனைத் திட்டத்தில் மூன்று பெரிய பல்பொருள் அங்காடிகள் (Supermarkets) இணைந்து அத்தியாவசியப் பொருட்களை வழங்கின. பள்ளிச் சீருடைகள் மற்றும் உபகரணங்கள் உள்ளிட்ட பல பொருட்களுக்கு 30% முதல் 40% வரை தள்ளுபடி வழங்கப்பட்டது என்று, மாநில உள்நாட்டு வர்த்தகம் மற்றும் வாழ்க்கைச் செலவின அமைச்சகத்தின் (KPDN) இயக்குனர் முகமட் முப்சி லாட் கூறினார்.
இந்த விற்பனைத் திட்டத்தில் 10,500-க்கும் மேற்பட்ட வாடிக்கையாளர்கள் கலந்து கொண்டனர். மேலும் இந்த மெகா மலிவு விற்பனையில் மொத்த விற்பனை சுமார் 80,000 ரிங்கிட் என மதிப்பிடப்பட்டுள்ளது.
இந்த மலிவு விற்பனை மூலம் ஒரு நுகர்வோர் சராசரியாக 150 முதல் 200 ரிங்கிட் வரை சேமிக்க முடிந்தது.
மக்களின் அமோக வரவேற்பைத் தொடர்ந்து, அடுத்த ஆண்டு முதல் ஒவ்வொரு நாடாளுமன்றத் தொகுதியிலும் மாதந்தோறும் இத்தகைய பெரிய அளவிலான மலிவு விற்பனைகளை நடத்தத் திட்டமிடப்பட்டுள்ளது. பிரதமர் டத்தோஸ்ரீ அன்வார் இப்ராஹிம், 2026-ஆம் ஆண்டிற்கான பட்ஜெட்டில் இந்தத் திட்டத்திற்காக 60 மில்லியன் ரிங்கிட் நிதி ஒதுக்கியுள்ளதாக அவர் மேலும் தெரிவித்தார்.
