IPL 2025 : மும்பை அணிக்கு 5ஆவது தொடர் வெற்றி.. 54 ரன்கள் வித்தியாசத்தில் லக்னோவை வென்றது

இந்த போட்டியில் டாஸ் வென்ற லக்னோ அணி பவுலிங்கை தேர்வு செய்தது.  இதையடுத்து மும்பை அணியின் தொடக்க வீரர்களாக ரிக்கெல்டன், ரோஹித் சர்மா களம் இறங்கினர். 5 பந்துகளை எதிர்கொண்ட ரோஹித் சர்மா 2 சிக்சர்களுடன் 12 ரன்கள் எடுத்து ஆட்டமிழந்தார்.

பின்னர் இணைந்த வில் ஜாக்ஸ் – ரிக்கெல்டன் இணை பொறுப்புடன் விளையாடி ரன்களை குவித்தது. 32 பந்துகளை எதிர்கொண்ட ரிக்கெல்டன் 4 சிக்சர் 6 பவுண்டரியுடன் 58 ரன்கள் எடுத்தார். ஜாக்ஸ்29 ரன்களில் ஆட்டமிழக்க, சூர்யகுமார் யாதவ் 28 பந்துகளில் அதிரடியாக 54ரன்கள் குவித்து ஸ்கோரை உயர்த்தினார்.

கடைசி ஓவர்களில் நமன் திர் 25ரன்களும், கோர்பின் போஸ்ச் 20 ரன்களும் எடுக்க 20 ஓவர்கள் முடிவில் 7 விக்கெட்டுகளை இழந்த மும்பை அணி 215 ரன்கள் எடுத்தது.

இதையடுத்து 216 ரன்கள் எடுத்தால் வெற்றி என்ற கடினமான இலக்கை நோக்கி லக்னோ அணி களம் இறங்கியது. தொடக்க வீரர் மார்க்ரம் 9 ரன்கள் எடுத்திருந்தபோது பும்ரா வேகத்தில் நமன் திரிடம் கேட்ச் கொடுத்து ஆட்டமிழந்தார். நிகோலஸ் பூரன் (27 ரன்), ரிஷப் பந்த் (4 ரன்) ஆகியோரது விக்கெட்டுகளை வில் ஜாக்ஸ் தான் வீசிய 7 ஆவது ஓவரில் கைப்பற்றினார்.

ஆயுஷ் பதோனி 35 ரன்களும், டேவிட் மில்லர் 24 ரன்களும் சேர்த்தனர்.  20 ஓவர்கள் முடிவில் அனைத்து விக்கெட்டுகளையும் இழந்த லக்னோ அணி 161 ரன்கள் மட்டுமே எடுத்து 54 ரன்கள் வித்தியாசத்தில் தோல்வியடைந்தது.

இதையும் படிங்க – IPL 2025 : விறுவிறுப்பான கட்டத்தில் ஐபிஎல் தொடர்.. இதுவரை அதிக ரன்கள் – விக்கெட் எடுத்தவர்கள் யார்?

மும்பை அணி தரப்பில் பும்ரா 4 ஓவர்கள் வீசி 22 ரன்கள் மட்டுமே விட்டுக் கொடுத்து 4 விக்கெட்டுகளை கைப்பற்றினார். போல்ட் 3 விக்கெட்டுகளையும், வில் ஜாக்ஸ் 2 விக்கெட்டுகளையும் எடுத்து லக்னோ அணியை சாய்த்தனர். இந்த வெற்றியின் மூலம் மும்பை அணி 12 புள்ளிகளுடன் தரவரிசையில் 2 ஆம் இடத்திற்கு முன்னேறியுள்ளது.