IPL 2025 : சென்னை அணிக்கு 10-ஆவது தோல்வி.. 6 விக். வித்தியாசத்தில் வென்றது ராஜஸ்தான்

இந்த போட்டியில் டாஸ் வென்ற ராஜஸ்தான் அணி பவுலிங்கை தேர்வு செய்தது. இதையடுத்து சென்னை அணியின் தொடக்க வீரர்களாக ஆயுஷ் மாத்ரே மற்றும் டெவோன் கான்வே களம் இறங்கினர்.

2 ஆவது ஓவரின் 4 ஆவது பந்தில் டெவோன் கான்வே 10 ரன்கள் எடுத்திருந்தபோது ஆட்டமிழக்க அவரைத் தொடர்ந்து களத்திற்கு வந்த உர்வில் படேல் ரன் ஏதும் எடுக்காமல் வெளியேறினார்.

ரவிச்சந்திரன் அஷ்வின் 13 ரன்களும், ரவிந்திர ஜடேஜா 1 ரன்னும் எடுத்து ஏமாற்றம் அளித்தனர். பின்னர் இணைந்த ஆயுஷ் மாத்ரே – டெவால்ட் ப்ரூவிஸ் இணை அணியை சரிவிலிருந்து மீட்டது.

விக்கெட்டுகள் விழுந்தாலும் அதிரடி ஆட்டத்தை தொடர்ந்த ஆயுஷ் மாத்ரே 20 பந்துகளில் 1 சிக்சர் 8 பவுண்டரியுடன் 43 ரன்கள் குவித்து ஆட்டமிழந்தார்.

ப்ரூவிஸ் 25 பந்துகளில் 42 ரன்கள் சேர்த்தார். சிவம் துபே 32 பந்துகளில் 39 ரன்களும், தோனி 17 பந்துகளில் 16 ரன்களும் சேர்க்க 20 ஓவர்கள் முடிவில் 8 விக்கெட்டுகளை இழந்த சென்னை அணி 187 ரன்கள் எடுத்தது.

இதையடுத்து 188 ரன்கள் எடுத்தால் வெற்றி என்ற இலக்கை நோக்கி ராஜஸ்தான் அணியின் பேட்ஸ்மேன்கள் விளையாடினர்.  தொடக்க வீரர்களாக களம் இறங்கிய யஷஸ்வி ஜெய்ஸ்வால் – வைபவ் சூர்யவன்றி சிறப்பான தொடக்கத்தை கொடுத்தனர்.

19 பந்துகளை எதிர்கொண்ட ஜெய்ஸ்வால் 2 சிக்சர் 5 பவுண்டரியுடன் 36 ரன்கள் எடுத்து ஆட்டமிழந்தார். அடுத்து வந்த சஞ்சு சாம்சனுடன் – வைபவ் சூர்யவன்ஷி சிறப்பாக பார்ட்னர்ஷிப் அமைத்தார். 31 பந்துகளை எதிர்கொண்ட சஞ்சு சாம்சன் 41 ரன்களில் ஆட்டமிழக்க, சூர்யவன்ஷி 33 பந்துகளில் 4 சிக்சர் 4 பவுண்டரியுடன் 57 ரன்கள் எடுத்து அணியை வெற்றிப் பாதைக்கு கொண்டு சென்றார்.

துருவ் ஜுரெல் 31 ரன்களும், ஷிம்ரோன் ஹெட்மேயர் 12 ரன்களும் சேர்க்க 17.1 ஓவரில் 4 விக்கெட்டை இழந்த ராஜஸ்தான் அணி 188 ரன்கள் எடுத்து வெற்றி பெற்றது. நடப்பு தொடரில் சென்னை அணி பெற்றுள்ள 10 ஆவது தோல்வி இது என்பது கவனிக்கத்தக்கது.