Last Updated:
இந்த வெற்றியின் மூலம் மும்பை இந்தியன்ஸ் அணி பாயின்ட்ஸ் டேபிளில் 7 ஆவது இடத்திற்கு முன்னேறியுள்ளது.
ஐபிஎல் கிரிக்கெட் தொடரில் இன்று நடைபெற்ற டெல்லி மற்றும் மும்பை அணிகளுக்கு இடையே நடைபெற்ற பரபரப்பான ஆட்டத்தில் மும்பை அணி 12 ரன்கள் வித்தியாசத்தில் வெற்றி பெற்றது. நடப்பு ஐபிஎல் தொடரில் டெல்லி எதிர்கொள்ளும் முதல் தோல்வி இதுவாகும்.
டெல்லியில் நடைபெற்ற இந்த போட்டியில் டாஸ் வென்ற டெல்லி அணி பவுலிங்கை தேர்வு செய்தது. இதையடுத்து மும்பை அணியின் தொடக்க வீரர்களாக களம் இறங்கிய ரோஹித் சர்மா 18 ரன்களும், ரிக்கெல்டன் 41 ரன்களும் எடுத்து நல்ல தொடக்கத்தை கொடுத்தனர்.
சூர்யகுமார் யாதவ் 40 ரன்களும் திலக் வர்மா 59 ரன்களும் அதிரடியாக சேர்க்க மும்பை ஸ்கோர் விறுவிறுவென உயர்ந்தது. கடைசி ஓவர்களில் நமன் திர் 17 பந்துகளில் 38 ரன்கள் எடுத்தார். 20 ஓவர்கள் முடிவில் 5 விக்கெட்டை மட்டுமே இழந்த மும்பை அணி 205 ரன்கள் குவித்தது.
இதையடுத்து 206 ரன்கள் எடுத்தால் வெற்றி என்ற இலக்கை நோக்கி களமிறங்கிய டெல்லி அணிக்கு ஜேக் ஃப்ரேசர் மெக்கர்க் முதல் பந்திலேயே ஆட்டமிழந்து அதிர்ச்சி கொடுத்தார்.
அடுத்து இணைந்த அபிஷேக் போரெல் – கருண் நாயர் இணை அதிரடியாக ரன்கள் சேர்த்து. இருவரும் 2 ஆவது விக்கெட்டிற்கு 61 பந்துகளில் 119 ரன்கள் பார்ட்னர்ஷிப் அமைத்தனர். போரெல் 33 ரன்களில் ஆட்டமிழக்க கருண் நாயர் 40 பந்துகளில் 89 ரன்கள் குவித்து வெளியேறினார்.
கே.எல். ராகுல் 15 ரன்களும், அசுதோஷ் சர்மா 17 ரன்களும், விப்ராஜ் 14 ரன்களும் எடுத்தனர். ஒரு கட்டத்தில் டெல்லி அணி வெற்றி பெற அதிக வாய்ப்புகள் காணப்பட்டது. ஆனால் 19 ஆவது ஓவரில் டெல்லி அணியின் 3 பேட்ஸ்மேன்கள் அடுத்தடுத்து ஆட்டமிழந்ததால், வெற்றி மும்பை அணியின் வசம் சென்றது.
இந்த வெற்றியின் மூலம் மும்பை இந்தியன்ஸ் அணி பாயின்ட்ஸ் டேபிளில் 7 ஆவது இடத்திற்கு முன்னேறியுள்ளது.
April 13, 2025 11:46 PM IST
