IND vs WI Test : WTC தொடர்களில் 2000 ரன்கள்.. புதிய சாதனை படைத்த கே.எல். ராகுல்!! | விளையாட்டு

வெஸ்ட் இண்டீஸ் கிரிக்கெட் அணி இந்தியாவில் சுற்றுப் பயணம் மேற்கொண்டு 2 போட்டிகள் கொண்ட டெஸ்ட் தொடரில் விளையாடி வருகிறது. முதல் போட்டியில் இந்திய அணி வெற்றி பெற்றுள்ள நிலையில் 2 ஆவது போட்டி டெல்லியில் இன்று தொடங்கி நடைபெற்று வருகிறது.

டாஸ் வென்ற இந்திய அணியின் கேப்டன் சுப்மன் கில் பேட்டிங்கை தேர்வு செய்தார். தொடக்க வீரர்களாக களம் இறங்கிய கே.எல். ராகுல் மற்றும் யஷஸ்வி ஜெய்ஸ்வால் நிதானமான ஆட்டத்தை வெளிப்படுத்தி ரன்கள் சேர்த்தனர். கே.எல். ராகுல் 54 பந்துகளில் 38 ரன்கள் எடுத்திருந்தபோது ஆட்டமிழந்து வெளியேறினார்.

இன்றைய ஆட்டத்தில் 38 ரன்கள் எடுத்ததன் மூலம் கே.எல். ராகுல் உலக டெஸ்ட் சாம்பியன்ஷிப் தொடருக்கான போட்டிகளில் 2 ஆயிரம் ரன்களை கடந்துள்ளார். இந்த சாதனையை 7 இந்திய வீரர்கள் ஏற்படுத்தியுள்ளனர்.

அவர்களில் ரிஷப் பந்த் 2,731 ரன்களுடன் முதலிடத்தில் உள்ளார். அடுத்தடுத்த இடங்களில் ரோஹித் சர்மா, சுப்மன் கில், விராட்கோலி, ரவிந்திர ஜடேஜா, யஷஸ்வி ஜெய்ஸ்வால் மற்றும் கே.எல். ராகுல் ஆகியோர் உள்ளனர்.

உலக அளவில் டெஸ்ட் சாம்பியன்ஷிப் போட்டியில் அதிக ரன்களை குவித்தவர்கள் பட்டியலில் இங்கிலாந்து அணியின் ஜோ ரூட் 6,080 ரன்களுடன் முதலிடத்தில் உள்ளார். அடுத்தடுத்த இடங்களில் ஸ்டீவ் ஸ்மித், மார்னஸ் லபுஷேன் உள்ளனர்.