தங்கத்தின் விலை குறைவதற்கும் அமெரிக்காவிற்கும் என்ன தொடர்பு?
தங்கம் மிகவும் பாதுகாப்பான முதலீடாக இருந்தாலும், அது எந்த வட்டியையும் தருவதில்லை. அமெரிக்க அரசுப் பத்திரங்கள் 5% வட்டி விகிதத்தை வழங்கும் போது, முதலீட்டாளர்கள் தங்கத்தை வைத்திருப்பதை விட, இந்தப் பத்திரங்களை வைத்திருப்பதையே அதிக லாபகரமானதாகக் கருதுகின்றனர். அரசுப் பத்திரங்கள் எந்தவித கூடுதல் உழைப்பும் இன்றி நிலையான வட்டி வருமானத்தை வழங்குகின்றன. மேலும், அமெரிக்க அரசாங்கத்தின் உத்தரவாதம் இருப்பதால், இவை தங்கத்திற்கு இணையான பாதுகாப்பைக் கொண்டிருக்கின்றன; அதோடு அமெரிக்க டாலரில் வட்டி வருமானம் கிடைக்கும் கூடுதல் நன்மையும் இதில் உண்டு. உதாரணமாக, உங்களிடம் 1,00,000 ரூபாய் இருந்தால், அதைக்கொண்டு தங்கம் வாங்கினால், அது வெறும் சொத்தாக மட்டுமே இருக்குமே தவிர, அதன் அளவு அதிகரிக்காது அல்லது தினசரி வருமானத்தையும் தராது. அதற்குப் பதிலாக, அந்தப் பணத்தை அமெரிக்க டாலராக மாற்றி, 5% வட்டி தரும் அமெரிக்க அரசுப் பத்திரங்களில் முதலீடு செய்தால், ஆண்டுதோறும் கூடுதல் வருமானம் ஈட்ட முடியும். எனவே, வட்டி விகிதங்கள் அதிகமாக இருக்கும்போது, மக்கள் தங்கள் தங்கத்தை விற்கவோ அல்லது புதிய தங்கம் வாங்குவதைத் தவிர்க்கவோ செய்கிறார்கள்; அதற்குப் பதிலாகத் தங்கள் முதலீட்டைப் பத்திரங்களின் பக்கம் திருப்புகிறார்கள். கடந்த சில மாதங்களாக இதுதான் நடந்து வருகிறது. இதன் விளைவாக, உலகளவில் தங்கத்திற்கான தேவை குறைந்து, அதன் விலையும் சரிந்துள்ளது.
