Gold Price: தொடர் உச்சத்தில் தங்கம்… விலை உயர்வுக்கு பின் இவ்வளவு காரணங்களா… பலரும் தெரிந்து கொள்ள வேண்டிய தகவல் | வணிகச் செய்திகள்

இந்த விலை உயர்வுக்குப் பின்னால் என்ன காரணம், இது தொடர்ந்து உயருமா என்ற கேள்விகளுக்கு பொருளாதார நிபுணர் ஆனந்த் ஸ்ரீனிவாசன் கூறுகையில், ” முதலில் தங்கத்தின் விலை ஏன் உயர்ந்தது என்றால், உலகம் முழுவதும் அதிகமாக பணம் அச்சிடப்பட்டதே முக்கிய காரணம் என்கிறார் அவர். கடந்த சில ஆண்டுகளில் அரசுகள் தேவைக்கு அதிகமாக பணத்தை வெளியிட்டதால், பணத்தின் மதிப்பு குறைந்துவிட்டது. பணத்தின் மதிப்பு குறையும்போது, மக்கள் தங்கள் பணத்தை பாதுகாப்பாக வைத்துக்கொள்ள தங்கம் போன்ற மதிப்புள்ள பொருட்களை வாங்க தொடங்குகிறார்கள்.

இதனால் தங்கத்திற்கு தேவை அதிகரித்து, அதன் விலை இயல்பாக உயர்ந்துவிட்டது. அதோடு, பல நாடுகளின் மத்திய வங்கிகள் தங்கத்தை பாதுகாப்பான சேமிப்பாகக் கருதி அதிகமாக வாங்கி வைத்துக்கொள்கின்றன. இந்திய ரிசர்வ் வங்கி உட்பட பல நாடுகள் தொடர்ந்து தங்கத்தை வாங்குவதால், சந்தையில் கிடைக்கும் தங்கத்தின் அளவு குறைகிறது. இதுவும் விலை உயர்வுக்கு காரணமாகிறது.

மேலும், பட்ஜெட்டுக்கு முன்பாக தங்கம் மற்றும் வெள்ளி மீது வரி உயரலாம் என்ற பேச்சும் இருப்பதால், மக்கள் முன்கூட்டியே வாங்கியதால் விலை மேலும் உயர்ந்தது. டாலருடன் ஒப்பிடும்போது ரூபாயின் மதிப்பு குறைவதும் தங்கம் விலை உயர ஒரு முக்கிய காரணம். வெள்ளி பெரும்பாலும் சோலார் பிளான்ட், மின்சாதனங்கள் மற்றும் தொழிற்சாலைகளில் அதிகமாக பயன்படுத்தப்படுகிறது. அதே நேரத்தில், சீனா போன்ற நாடுகள் வெள்ளியின் விநியோகத்தை கட்டுப்படுத்தியுள்ளதால், சந்தையில் வெள்ளி குறைந்து விலை வேகமாக உயர்ந்துள்ளது. இதனால் வரும் நாட்களிலும் வெள்ளியின் விலை மேலும் உயர வாய்ப்பு இருப்பதாக அவர் தெரிவிக்கிறார்.

இப்படிப்பட்ட சூழலில் தங்கம், வெள்ளியில் இப்போது முதலீடு செய்யலாமா என்றால், சிறிது கவனம் தேவை என நிபுணர்கள் அறிவுறுத்துகிறார்கள். விலை உச்சத்தில் இருக்கும் போது, சற்று குறையும் வாய்ப்பு உள்ளது; சுமார் 1000 முதல் 2000 ரூபாய் வரை சரிவு வரலாம். ஆனால் தங்கம் பெரிய அளவில் குறைய வாய்ப்பு இல்லை என்றும் அவர் கூறுகிறார்