‘மணி கன்ட்ரோல்’ (Moneycontrol) வெளியிட்ட அறிக்கையின்படி, உள்நாட்டுச் சந்தையில் 10 கிராம் 24-காரட் தங்கத்தின் விலை இந்த ஆண்டு ஜனவரி 29 அன்று ரூ. 1,82,000 என்ற வரலாற்று உச்சத்தைத் தொட்டது. அதன் பிறகு, சர்வதேசச் சந்தை நிலவரங்கள், அமெரிக்க ஃபெடரல் ரிசர்வ் வட்டி விகிதங்கள் குறித்த எதிர்பார்ப்புகள் மற்றும் டாலரின் மதிப்பு உயர்வு ஆகியவற்றால் விலை படிப்படியாகக் குறைந்தது. ஜூன் 30, 2026 நிலவரப்படி, 10 கிராம் 24-காரட் தங்கத்தின் விலை சுமார் ரூ. 1,40,130-ஐ எட்டியது. அதாவது, வரலாற்று உச்சத்திலிருந்து சுமார் ரூ. 41,000 குறைந்திருந்தாலும், கடந்த ஆண்டு இதே காலகட்டத்தில் இருந்த ரூ. 95,600 விலையுடன் ஒப்பிடுகையில் தங்கத்தின் விலை இன்னும் மிக அதிகமாகவே உள்ளது. இதனால்தான், தங்கத்தை வைத்திருப்பவர்கள் பணத் தேவைக்குத் தங்கள் நகைகளை விற்பதை விட, அவற்றின் மீது கடன் பெறுவதையே சிறந்த வழியாகக் கருதுகின்றனர். பொதுவாக, தங்கத்தின் விலை கணிசமாக உயரும்போது, பலர் தங்கள் பழைய நகைகளை விற்று லாபம் ஈட்ட நினைப்பார்கள். ஆனால், இம்முறை நிலைமை சற்று மாறுபட்டதாகத் தெரிகிறது. உச்ச நிலையிலிருந்து தங்கத்தின் விலை குறைந்திருந்தாலும், நீண்ட காலத்தில் விலை மீண்டும் உயரும் என்று எதிர்பார்ப்பதால், பல குடும்பங்கள் தங்கள் நகைகளை நிரந்தரமாக விற்கத் தயங்குகின்றன. அதற்குப் பதிலாக, தேவையான தொகையை மட்டும் தங்கக் கடனாகப் பெற்றுக்கொண்டு, பின்னர் கடனைத் திருப்பிச் செலுத்தி நகையைத் திரும்பப் பெறும் உத்தியையே அவர்கள் பின்பற்றுகின்றனர்.
