FIFA உலகக் கோப்பை 2026: ஜெர்மனி, நெதர்லாந்து அணிகள் இன்று மோதல்! இந்தியாவில் நேரலையில் பார்ப்பது எப்படி? | Other Games News (பிற விளையாட்டு செய்திகள்)

இந்த நாளின் முதல் ஆட்டத்தில், நான்கு முறை உலக சாம்பியனான ஜெர்மனி அணி, உலகக் கோப்பைத் தொடருக்குப் புதிய வரவான குரகோவ் அணியை எதிர்கொள்கிறது. ஹூஸ்டனில் நடைபெறும் இந்த ஆட்டம் இந்திய நேரப்படி இன்று, ஞாயிற்றுக்கிழமை இரவு 10:30 மணிக்குத் தொடங்குகிறது. புதிய பயிற்சியாளர் நாகெல்ஸ்மேன் தலைமையிலான வலுவான ஜெர்மனி அணி இந்தத் தொடரை ஒரு பிரம்மாண்ட வெற்றியோடு தொடங்கத் திட்டமிட்டுள்ளது.

அதே நேரத்தில், அறிமுக அணியான குரகோவ் அதிர்ச்சி தோல்விகளைத் தவிர்த்து நாக்-அவுட் சுற்றுக்கு முன்னேறும் கனவோடு களம் காண்கிறது. இதனைத் தொடர்ந்து, குரூப் ‘எஃப்’ பிரிவின் ஒரு மாபெரும் பிளாக்பஸ்டர் ஆட்டத்தில் நெதர்லாந்து மற்றும் ஜப்பான் அணிகள் டல்லாஸ் நகரில் மோதிக்கொள்கின்றன. இந்த ஆட்டம் இந்திய நேரப்படி ஜூன் 15, திங்கட்கிழமை அதிகாலை 1:30 மணிக்குத் தொடங்குகிறது.

கடந்த உலகக் கோப்பைத் தொடரில் பல முன்னணி அணிகளுக்கு அதிர்ச்சி தோல்வியளித்த ஜப்பான், இந்த முறையும் நெதர்லாந்துக்குக் கடுமையான சவாலை அளிக்கும் என்று எதிர்பார்க்கப்படுகிறது. மற்றொரு ஆட்டத்தில், ஆப்பிரிக்காவின் பலம் வாய்ந்த ஐவரி கோஸ்ட்  அணி, எக்குவடோர் அணியை எதிர்கொள்கிறது.

அமத் தியல்லோ, ஃபிராங்க் கெஸ்ஸி போன்ற நட்சத்திர வீரர்களைக் கொண்ட ஐவரி கோஸ்ட் மற்றும் தகுதிச் சுற்றில் அசத்திய எக்குவடோர் மோதும் இந்த ஆட்டம் திங்கட்கிழமை அதிகாலை 4:30 மணிக்குத் தொடங்குகிறது. இறுதியாக, திங்கட்கிழமை காலை 7:30 மணிக்கு நடைபெறும் ஆட்டத்தில் ஸ்வீடன் மற்றும் துனிசியா அணிகள் மான்டேரி நகரில் பலப்பரீட்சை நடத்துகின்றன.

இந்தியாவில் உள்ள கால்பந்து ரசிகர்கள் 2026 உலகக் கோப்பையின் அனைத்து 104 போட்டிகளையும் தங்களின் மொபைல் மற்றும் ஸ்மார்ட் டிவிகளில் நேரலையாகக் கண்டுகளிக்கலாம். இந்தத் தொடருக்கான அதிகாரப்பூர்வ இந்திய ஒளிபரப்பு உரிமத்தை ஜீ என்டர்டெயின்மென்ட் நிறுவனம் பெற்றுள்ளது. இதனால், ஒரே நேரத்தில் நடைபெறும் பல குரூப்-ஸ்டேஜ் போட்டிகள் உட்பட அனைத்து ஆட்டங்களும் Zee5 ஆப் மற்றும் அதன் இணையதளத்தில் பிரத்தியேகமாக நேரடி டிஜிட்டல் ஸ்ட்ரீமிங் செய்யப்படுகின்றன.