Erode Weekly Textile Market Hit Hard – Business Drops from Rs.5 Crore to Rs.50 Lakh | தமிழ்நாடு செய்திகள் (Tamil Nadu News)

ஈரோடு மாநகரில் பன்னீர்செல்வம் பூங்கா, காந்திஜி சாலை, சென்ட்ரல் மார்க்கெட், பவானி சாலை அசோகபுரம் உள்ளிட்ட பகுதிகளில் இயங்கி வரும் கிடங்குகள் மற்றும் சந்தைகளில், ஒவ்வொரு வாரமும் திங்கட்கிழமை மாலை தொடங்கி இரவு முழுவதும் ஜவுளி வாரச்சந்தை நடைபெற்று வருகிறது. இந்த சந்தை தமிழ்நாடு மட்டுமின்றி ஆந்திரா, கர்நாடகா, கேரளா போன்ற வெளிமாநிலங்களிலும் புகழ்பெற்றதாகும். இங்கு வெளிமாநில வியாபாரிகள் மற்றும் பல்வேறு மாவட்டங்களைச் சேர்ந்த சிறு, குறு வணிகர்கள் திரண்டு வந்து மொத்தமாக துணிகள் வாங்கிச் செல்வது வழக்கமாக இருந்து வந்தது. குறிப்பாக, ரம்ஜான் பண்டிகையை முன்னிட்டு இந்த வாரம் அதிக வர்த்தகம் நடைபெறும் என வணிகர்கள் எதிர்பார்த்திருந்தனர்.

ஆனால், தேர்தல் விதிமுறைகள் காரணமாக ரூ.50 ஆயிரத்திற்கு மேற்பட்ட பணத்தை உரிய ஆவணங்களுடன் மட்டுமே எடுத்துச் செல்ல வேண்டும் என்ற கட்டுப்பாடு அமலில் இருப்பதால், சிறு வியாபாரிகள் பலர் சந்தைக்கு வராமல் தவிர்த்துள்ளனர். இதன் விளைவாக, இந்த வாரம் நடைபெற்ற இரவு நேர ஜவுளி சந்தை வழக்கத்திற்கு மாறாக வெறிச்சோடியது. இது குறித்து வணிகர்கள் கூறுகையில், “சிறு வியாபாரிகள் பெரும்பாலும் ரொக்கப் பணத்திலேயே பரிவர்த்தனை செய்கிறோம். உரிய ஆவணங்களை ஏற்பாடு செய்வதில் சிரமம் இருப்பதால் தேர்தல் காலங்களில் சந்தைக்கு வர இயலாமல் போகிறது. இதனால் வியாபாரம் கடுமையாக பாதிக்கப்படுகிறது” என்றனர்.

மேலும், ஒவ்வொரு தேர்தல் காலத்திலும் இந்த பிரச்சினை தொடர்ந்து ஏற்படுவதால், குறைந்தபட்சம் ரூ.2 லட்சம் வரை ஆவணங்கள் இன்றி பணம் கொண்டு வர விலக்கு அளிக்க அரசும், தேர்தல் ஆணையமும் நடவடிக்கை எடுக்க வேண்டும் என ஜவுளி வணிகர்கள் கோரிக்கை விடுத்துள்ளனர். திங்கள் முதல் செவ்வாய் வரை 5 கோடி ரூபாய் வர்த்தகம் நடைபெறும் நிலையில் 50 லட்ச ரூபாய் கூட வியாபாரம் நடைபெறவில்லை எனவும், இதனால் ஜவுளி வர்த்தகம் பாதிக்கப்பட்டுள்ளதாக வியாபாரிகள் தெரிவித்தனர்.