Barak System : ஈரானின் அதிநவீன ட்ரோன்களை சுட்டு வீழ்த்தும் இஸ்ரேல்.. இணையத்தில் வைரலாகும் வீடியோ

ஆளில்லா தாக்குதல் விமானத்தை குறி வைத்து ஏவப்பட்ட தடுப்பு அமைப்புகள் அந்த ட்ரோனை வெடித்துச் சிதறச் செய்கின்றன. இதில் தீப்பிழம்பு வெளிப்பட்டு அந்த ட்ரோன் சுட்டு வீழ்த்தப்படுகிறது.

ஈரான் நாடு அணுசக்தி திட்டங்களை மேற்கொண்டு வருவது தங்களுக்கு அச்சுறுத்தலாக இருப்பதாக கூறி இஸ்ரேல் அதற்கு எதிர்ப்பு தெரிவித்து வருகிறது. இந்நிலையில், ஈரானின் அணுசக்தி திட்டங்களை முடக்கும் விதமாக கடந்த சில நாட்களாக இஸ்ரேல் அதிரடி தாக்குதலை நடத்தி வருகிறது. ஈரான் நாட்டில் செயல்படும் அணுசக்தி மையங்களை குறி வைத்து தாக்குதல் நடத்தப்படுகின்றன.

இரு தரப்பிலும் பொருள் மற்றும் உயிர் சேதங்கள் ஏராளம் ஏற்பட்டிருக்கக்கூடிய சூழலில், இந்த மோதலை முடிவுக்கு கொண்டுவர வேண்டும் என பல்வேறு உலக நாடுகள் வலியுறுத்தி வருகின்றன. இருப்பினும், இரு நாடுகளும் தாக்குதலை நிறுத்தாமல் தொடர்ந்து மோதல் போக்கை கடைபிடித்து வருகின்றன.

இந்த நிலையில், ஈரானின் ட்ரோன் விமானத்தை இஸ்ரேலின் பராக் வான் பாதுகாப்பு அமைப்பு சுட்டு வீழ்த்தும் வீடியோ காட்சி ஒன்று சமூக வலைதளங்களில் அதிகம் பகிரப்பட்டு வருகிறது. இந்த பராக் வான் பாதுகாப்பு அமைப்பை இஸ்ரேல் நாடு உள்ளூரிலேயே தயார் செய்திருக்கிறது.

வான்வழி மூலம் வரும் எந்த ஒரு அச்சுறுத்தலையும் இந்த பராக் தடுப்பு அமைப்பு இஸ்ரேலுக்கு பாதுகாப்பு அளிக்கும் என்று அந்நாட்டின் ராணுவ தலைவர்கள் தெரிவித்துள்ளார்கள்.